雙向鏈結串列（英文：doubly linked list）係種鏈結數據結構，由若干個節點組成，有一個頭同一個尾，每個節點含有三樣嘢：一個值（可以係單一數據，或者概念上係任何數據結構）、上一個節點嘅位置同下一個節點嘅位置。
同鏈結串列一樣，雙向鏈結串列都係一種循序存取嘅數據結構，但係同鏈結串列唔同嘅係搵嘢可以揀由頭搵定由尾搵，搵嘅時候亦都可以揀向前行定向後行。
喺低階嘅層次，上或者下一個節點嘅位置通常係指指標。但係雙向鏈結串列亦都可以作為一種抽象概念，運用喺例如陣列之上；喺呢類情形，節點嘅位置就未必係指標，例如，如果雙向鏈結串列係建立喺陣列上面，節點嘅位置就會係整數嘅陣列索引值。
