難波

日本 > 近畿地方 > 大阪府 > 大阪市 > 中央區、浪速區 > 難波

南海難波站同埋高島屋百貨大阪店

難波公園

難波丸井賣場

難波（粵拼：naan6 bo1；日文：難波なんば^(nanba)）係日本大阪市嘅一笪埞。難波係大阪兩大繁華街之一，位於大阪嘅「南」（ミナミ（minami）），政區上分屬中央區、浪速區。難波係大阪市中南部主要嘅鐵路上落埞，有西日本旅客鐵道（大和路線）、近畿日本鐵道（近鐵難波線）、南海電氣鐵道（南海本線、高野線）、大阪市營地下鐵嘅三條綫（御堂筋線、四橋線、千日前線）。大阪嘅「南」係指從心齋橋站一帶到難波站附近呢咁大笪嘅地區，其中嘅「難波」一般係指道頓堀以南、千日前以西嘅地方，不過有啲時候，呢個地名亦包埋道頓堀、千日前、湊町、日本橋。難波嘅舊舖、高檔店口多過心齋橋，「南」以花樣多嘅舖頭做特色嘅玄關口亦位於難波。JR難波站同大阪難波站之間有地下街連通。JR難波站舊名叫湊町站，因此而家習慣上將呢個站嘅週邊都嗌做湊町，但實質上呢個站係搬過嘅，原先嘅位置喺浪速區嘅湊町，同而家習慣嗌嘅湊町唔係同一位置。

喺難波道頓堀週邊有大阪最出名嘅兩大景觀之一固力果霓虹告白（Glico Man），同時蟹道樂嘅總店亦喺呢度，門口上面隻巨蟹（Giant Crab）亦係當地地標。難波亦係大阪有名嘅遊樂街區，有好多嘅居酒屋、飯店、夜店、遊戲室、彈珠機室。同時難波亦係大阪出名嘅購物中心，高島屋百貨公司、難波CITY商場都喺呢度。

難波公園（なんばパークス（nanba pākusu）；Namba Parks），係新開嘅高層複合設施，由120間舖、空中花園、以及叫做「公園塔」（パークタワー（pāku tawā）；Park Tower）嘅寫字樓組成。第二到第五層係商業區，第六層係餐飲區，有好多種類嘅餐廳，比如韓國菜、日本菜、意大利菜。而個空中花園整來畀啲遊客休息娛樂，來調制返市中心嘅環境。另外，佢重有開現場騷嘅露天戲院，以及有笪作爲私人菜園嘅埞，訂咗菜園嘅人可以喺入面體驗農作。佢重有馬車舖呢樣嘢添。