電腦熒光幕
(由電腦熒幕跳轉過嚟)
呢篇文講顯示影像嘅設備。想搵顯示器顯示部分嘅話，請睇螢幕。電腦熒光幕，簡稱熒光幕或者螢幕，又叫監視器、芒或者MON（英文：monitor），亦有人叫顯示器（英文：display），係種常用嘅電腦輸出設備，用電腦嘅人可以用佢嚟睇資訊，又或者作為娛樂用途，總之就係用芒嘅人可以睇到電腦嘅各種輸出。最初嘅芒係用電子槍，而今就通常係 LCD，而 LCD 就以 TFT 居多，另外重有第啲用唔同技術嘅芒。
熒光幕其實係指顯像管；｢幕｣ 係英文 screen 嘅意譯，而 ｢熒光｣ 就係指顯像原理，即係塊幕後面嘅磷質受到射落幕嘅電子刺激，就會發熒光；技術上，LCD 芒嘅原理同熒光並冇任何關係。