音界號

  提示：呢篇文講嘅唔係分隔號。

音界號（台灣標準者為「．」；大陸標準者為「·」）係種中文標點符號，用作相關部件嘅分隔，寫成居中嘅一個實心圓點仔（除註明例外者，連空位一律佔一格）；喺唔少電子設備上面，呢個符號嘅輸入同顯示都會唔妥。佢家陣喺台灣同大陸嘅通常叫法都係間隔號；唔算多人用嘅名有音界標、音隔號及分讀號。

此標點符號喺大陸同台灣相通嘅用法為：間開翻譯姓名中嘅姓同名／各個詞語、間開著作之中嘅系列名、書名、篇名、章名、節名……及間開著作名之中為並列關係嘅項目。喺台灣，佢重會用嚟間開整數同小數（只限中文數字）。喺大陸，佢重會用嚟間開年、月同日（用阿拉伯數字時，連空位只佔半格）。香港及澳門嘅用法唔統一——雖然喺文字上同民國一樣用繁體字／正體字，但係喺主權上同大陸都屬於中共，因此喺標點符號上可謂各師各法。