餬 (麻雀)

餬係一個麻雀術語，舊時叫「湖」，臺灣作「胡」，中國大陸同日本叫「和（粵音wu4，或者變調讀wu2，唔讀wo4）」，係指搞掂鋪牌，取得勝利。打麻雀每一局最終目的，就係「食餬」。

基本上打麻雀，只要湊成「四搭一對」嘅標準牌型就可以食糊，不過臺灣麻雀同福建麻雀由於打十六張，所以湊夠「五搭一對」先食到餬。四搭或者五搭，係指四組或五組順子或者刻子組合，而一對即係指一對相同嘅牌作為「眼」，湊成「四搭一對」或者「五搭一對」，就可以食餬。但亦有特殊牌型，例如：八仙過海、七搶一、十三么、十三不搭或十三不靠等牌型，都唔係以「四搭一對」或「五搭一對」食餬。

食餬之後要開牌話畀人知你食咗餬，但如果開出嘅牌根本唔係一副餬牌，噉就叫做「詐餬」，食詐餬當輸三家，因為你阻住咗牌局嘅正常進行。

基本食餬方式

自摸

日本叫「自摸和」，即係輪到自己摸牌，而摸返嚟隻牌啱啱食到餬，咁就叫自摸。

出銃

又叫出衝，亦有人寫做出蔥、出沖，台灣叫「放槍」或者「放炮」，日本就叫「榮和」，即係其他人打出隻牌，而你拎咗隻牌就可以食餬，咁你就可以搶隻牌畀自己食餬。

槓上開花

又叫槓上花，日本叫「嶺上開花」，喺槓咗之後一般要補一隻牌，而模返嚟隻補牌咁啱又湊成一副餬牌，咁就叫「槓上開花」。

搶槓

台灣同日本都係叫返搶槓，指當某一家加槓嗰陣，加槓隻牌咁啱自己可以食餬，咁就可以將呢隻牌搶返嚟畀自己食餬。

截胡、炮炮響

如果有人出銃，咁啱其他幾家都食到餬，呢個情況，只有下家先有優先權食餬，呢種就叫做截胡。而台灣牌就叫呢個情況做「炮炮響」，炮炮響有分「一炮三響」或者「一炮兩響」，形容一打隻牌出嚟，三個人或者兩人個都嗌餬，呢個情況，出銃者要包輸晒，「一炮三響」就輸三家，「一炮兩響」就輸兩家。不過亦有「攔餬」制，同截胡一樣由出銃者下家優先食餬，港式台灣牌多數行呢種例。日本叫「兩家和」同「三家和」，同樣都係出銃者下家優先食餬。

天餬

一開局排好副牌乜都唔使做已經係副餬牌，咁可以食天餬。

地餬

莊家打出第一隻，其他任何一家食餬，咁呢鋪牌就叫做地餬。