香港政府公務員建屋合作社
香港政府公務員建屋合作社（英文：Civil Servants' Co-operative Building Societies），簡稱公務員合作社、公務員樓，係戰後香港公務員嘅房屋福利。1950年代，香港政府推出咗長俸公務員房屋福利計劃，公務員合作社係其中一環。由至少10個公務員組成合作社，之後政府以優惠價錢批地畀合作社起樓（最初係地價一半，後嚟變成三分一），政府重會借錢畀合作社嚟交地價同建築費。計劃喺1970年代停過，到1980年代又開始返，最後到80年代中期先至真正取消。期間總共成立咗238個合作社，起咗5000幾個單位。[1]
歷史
編輯1952年，香港政府為咗提供畀本地公務員房屋福利，參考咗外國嘅合作社房屋，推行「公務員建屋合作社計劃」。首先由唔少過10個公務員組成合作社，之後佢哋要交計劃書，同政府交代成個起屋計劃，重要證明到自己日後係可以還到錢畀政府，起好樓之後，單位嘅業權屬於合作社。[2]
1956年，作為第一個試點嘅西環寶翠園落成。
1987年，為咗回應合作社社員嘅要求，政府推出咗合作社解散嘅機制，訂明要全體社員同意，合作社先可以解散，後來到1993年，門檻調低到75%社員支持就可以解散。喺2016年嘅立法會文件顯示，全香港仍然有52個合作社未解散。[3]
1990年代開始，隨住合作社解散，一啲公務員樓開始畀發展商收購重建，最出名嘅例子就係第一個落成嘅項目寶翠園。而合作社業權同埋補地價問題，令公務員樓重建速度緩慢，土瓜灣美善同道、九龍塘、西灣河等地仍然有好多公務員樓。
值得一提嘅係，政府喺1960年代有另一個叫做「政府為公務員興建樓宇計劃」，計劃得兩個項目落成（龍翔苑同康利苑），雖然來自唔同計劃，但一般大眾都叫佢哋做公務員樓。
分佈
編輯238個合作社總共有245幢樓（有啲合作社唔止會用到1幅地），大部分用喺市區，尤其是九龍城區佔最多：
- 中西區：10
- 灣仔區：34
- 東區：49
- 南區：7
- 油尖旺區：16
- 深水埗區：17
- 九龍城區：108
- 觀塘區：1
- 荃灣區：1
- 葵青區：1
- 沙田區：1
睇埋
編輯參考
編輯- ↑ 〈合作有間：從政府檔案看「公務員建屋合作社」的歷史 – WMA〉 (中國中文)。原著喺2023-07-08歸檔。喺2023-07-08搵到。
- ↑ 〈公務員建屋合作社計劃背景〉 (PDF)。
{{cite web}}: CS1 maint: url-status (link) - ↑ 〈公務員建屋合作社樓宇重建事宜小組委員會 因應 2016 年 3 月 1 日會議上所作討論而須採取的跟進行動〉 (PDF)。
{{cite web}}: CS1 maint: url-status (link)