香港美誠月餅

香港美誠月餅（英文：Meisun）係一個宣稱自己係「香港品牌」嘅月餅生產商，但事實係喺廣東廣州同佛山出產，從未喺香港生產同發售，被認為係「山寨」香港嘅「美心月餅」^[1]。呢單詐騙係2024年中秋節之前被踢爆，結果推銷商「合肥三只羊網絡科技有限公司」被合肥市政府當局立案調查，最後決定沒收違法所得同埋罰款共6894.91萬人民幣。

2024年8月左右，中國網絡紅人「瘋狂小楊哥」（本名張慶楊）喺抖音開直播推銷「香港美誠月餅」，期間香港無綫電視總經理曾志偉更帶埋新抱王敏奕出現喺直播一齊試食月餅。結果月餅喺抖音嘅一個月銷售額超過五千萬人民幣，喺抖音嘅銷量更超越咗美心月餅。

對於「假香港品牌」嘅指控，香港美誠月餅生產商話2019年就已經喺香港註冊品牌，又話「品牌基因與研發團隊」都係「源自香港」，更加話都冇法律規定「香港品牌」唔准喺中國大陸生產。