馮延巳

馮延巳（粵拼：fung4 jin4 zi6；903年—960年6月23號），字中正（zung1 zing3），廣陵人（而家江蘇揚州），係五代十國時南唐嘅詞人、官員。

馮延巳
字	中正
出世	903年
死	960年
國籍	南唐
籍貫	廣陵（江蘇揚州）
職業	官員、詞人

生平

馮延巳嘅老豆馮令額入仕唐烈祖，做到歙州監鐵院判官。馮延巳自細文藝嘅名聲幾高，大個後因爲佢嘅名聲而烈祖畀佢做秘書郎，就噉起家，後來做書記。佢擅用權術打擊人，最後攀爬到無人能及嘅地位。馮延巳亦恃住佢自身嘅才藝，睇唔起其他人，孫忌曾經當面鬧佢。常夢錫話過畀皇帝聽，馮延巳係小人，唔留得喺身邊，原本烈祖準備趕佢走，但嗰陣時就駕崩咗，輪到唐元宗繼位，因爲噉佢保住咗地位。

之後佢歷任過諫議大夫翰林學士、戶部侍郎、翰林學士承旨、中書侍郎、同平章事、集賢殿大學士、太子少傅、撫州節度使，然後因爲屋企啲書離任一段時間，復官後做冠軍大將軍、太弟太保，領潞州節度使，然後係左僕射同平章事。之後馮延巳好驕傲，話自己嘅才能經營天下都濕濕碎，於是唐元宗任用佢做宰相，不過馮延巳當初靠嘅係文藝嘅能力昇進，其實無乜其他才能，所以啲嘢管唔好，只能靠講大話冚過去，話烈祖啲是非，然後話元宗噉先至叻噉樣。

因爲南唐過度擴張，好似湖南朗州呢啲地方就反叛，令南唐疲於應付。對於湖南嘅反叛，原本皇帝嘅諗法係安撫佢哋，但馮延巳想爭功，係都要出兵打佢哋，結果搞到一鑊泡。因爲噉，朝野對馮延巳意見好大，但唐元宗親信佢。直到後周打南唐，令南唐無咗大忽江北領土，噉先至罷免馮延巳。罷免後，馮延巳仲做太子少傅，然後因爲病改任太子太保。死後佢獲得諡號忠肅（zung1 suk1）。

馮延巳有細佬馮延魯，亦係有名文人，同佢阿哥一樣係結黨營私、阿諛奉承嘅人，所以佢同佢阿哥入列爲「南唐五鬼」，即係南唐嘅五大奸臣。

文學

雖然馮延巳嘅政治名聲評價好臭，但佢嘅文學成就幾高。佢係南唐中主嘅老師，詞風清麗，善於寫離愁別緒，佢嘅詞作係五代詞人中流傳最多嘅，啲人評佢有元和詞人嘅氣格。啲人認爲佢開創咗「以景寫情」嘅手法，對李煜影響好大。喺之前有花間詞風，專寫埋曬啲花柳風情，側重寫女人嘅服飾容顏，或者具體情事，到馮延巳呢度，呢啲咁具體嘅嘢唔講，而係着力講心境，講意緒，具體咩事由讀者想象。

馮延巳雖然政治上冇作爲，但佢身處嘅時代，南唐畀後周、宋朝威脅，佢自身亦喺官場惡鬥中屢受貶斥，所以內心會有種憂患意識。佢嘅心境係由佢嘅環境遭遇同思想性格造成嘅，所以佢詞中所描嘅心境可以畀讀者好大嘅想象空間，比前代嘅花間詞有內涵好多，所以佢開啓咗南唐詞風，乃至打開咗宋詞嘅一代風氣。而家佢有《陽春集》傳世。

喺文學上有則趣事。南唐中主曾經對佢講：「吹皺一池春水，干卿何事?」，佢就答話：「未如陛下小樓吹徹玉笙寒。」呢度引用嘅分別係馮延巳同李璟嘅詞作名句。

作品舉例

謁金門 風乍起，吹皺一池春水。 閒引鴛鴦香徑裏，手挼紅杏蕊。 斗鴨闌干獨倚，碧玉搔頭斜墜。 終日望君君不至，舉頭聞鵲喜。

鵲踏枝 誰道閒情拋擲久？每到春來，惆悵還依舊。 日日花前常病酒，不辭鏡裏朱顏瘦。 河畔青蕪堤上柳，爲問新愁，何事年年有？ 獨立小橋風滿袖，平林新月人歸後。

長命女 春日宴，綠酒一杯歌一遍，再拜陳三願： 一願郎君千歲， 二願妾身長健， 三願如同梁上燕，歲歲長相見。

參攷資料

• 陸游. 〈卷十一 — 馮延巳傳〉. 《《南唐書》》.