黃山

黃山（粵拼：wong4 saan1）喺中國安徽南部黃山市境內，南北長約40公里，東西闊約30公里，山脈面積1200平方公里，中心景區面積約160.6平方公里，主體以花崗岩構成，最高處係蓮花峰，海拔1864米。

黃山原名黟山，係因為山岩青黑色得名。後因傳說軒轅黃帝喺度煉丹成仙，唐玄宗信奉道教，所以喺天寶六年（公元747年）六月十七號改名做「黃山」。

明朝人徐霞客兩次去黃山，讚話：「五嶽歸來不看山，黃山歸來不看岳」。徐霞客評黃山有「泰岱之雄偉、華山之險峻、衡岳之煙雲、匡廬之飛瀑、雁盪之巧石、峨嵋之清秀」，譽為「天下第一奇山」。

黃山1982年入選第一批國家重點風景名勝區；1986年評為中國十大風景名勝之一；1990年12月俾聯合國教科文組織列入世界遺產名錄；2004年2月入選世界地質公園。