黃迺元
經歷
編輯黃迺元出身中產家庭，曾經喺香港藝術學院選修藝術文學士，後嚟去咗社福機構做組織幹事、主力服務露宿者。佢為咗實測自己整畀露宿者用嘅生活用品，喺油麻地體驗咗一個月露宿者生活，其間俾人誤會係失業人士而被介紹做清潔工，而佢又想認識下呢一行，於是就入咗行，後來再成為管工[1]。
職工盟成員時期
編輯黃迺元喺2019年加入職工盟，2021年因為主席吳敏兒被羈押而署任主席[2]。
《港版國安法》實施之後，職工盟等非建制派組織成為親中派媒體同香港警察國安處監察攻擊嘅對象，成員受人身安全威脅。有親中派話職工盟有聯繫嘅國際工會聯合會係「披跨國工會外衣的政治組織」，指控職工盟係「外國代理人」；又指職工盟支援罷工同支援新工會成立。最終職工盟喺2021年9月啟動解散程序，10月解散，黃迺元成為最後一任職工盟主席。[3][4]
黃迺元喺啟動解散程序嘅記者會上，形容職工盟行到呢一步象徵獨立自主工運受挫。佢同時反駁職工盟係「外國代理人」嘅指控，話隸屬中國政府系統嘅中華全國總工會一樣有參與國際工會聯合會嘅活動，就算係同美國婦聯嘅團結中心之間嘅活動都冇涉及政治。至於被指支援罷工同支援新工會成立，佢話呢啲本來就係《基本法》畀嘅權利，對被指控無法理解。質問身為「非建制工會」係唔係就係原罪[5][4]。
後來黃迺元坦言自己作為主席嘅表現，比唔上李卓人同吳敏兒兩位先後被政治檢控嘅前主席。佢又話自職工盟解散後，搞工會難咗好多，又難搵地方開記招；自己亦患上創傷後壓力症。[2]。
職工盟解散後
編輯職工盟解散後，佢繼續做清潔服務業職工會會長[2]，繼續為工人服務。例如佢喺2022年2月商台一個節目入面，爭取將肺炎納入職業病，噉啲清潔工染病或者係要檢疫，薪酬都會有保障[6]。
參考
編輯- ↑ 1.0 1.1 〈【解散潮】職工盟「末代主席」專訪 黃迺元：我不是一個好有能力的人〉。Radio Free Asia (英文)。喺2022-02-14搵到。
- ↑ 2.0 2.1 2.2 〈【離散之年】職工盟解散後患創傷後遺症 末代主席黃迺元工運路上續耕耘：改變唔會從天而降〉。《明周文化》 (美國英文)。2021-12-31。喺2022-02-14搵到。
- ↑ 〈職工盟10‧3大會表決解散 前主席：失獨立工會「政治清零」 學者：京只接受左派 - 20210918 - 要聞〉。《明報新聞網 - 每日明報 daily news》 (繁體中文)。喺2022-02-14搵到。
- ↑ 4.0 4.1 吳倬安 (2021-09-19)。〈職工盟啟動解散程序 黃迺元稱成員受人身安全威脅：撐唔到落去〉。《香港01》 (香港中文)。喺2022-02-14搵到。
- ↑ 〈港職工盟啟動解散 黃迺元：獨立自主工運的挫敗 | 兩岸 | 中央社 CNA〉。www.cna.com.tw (中文)。喺2022-02-14搵到。
- ↑ 〈黃迺元促政府將新冠肺炎納入職業病｜本地｜商業電台 881903〉。《商業電台 881903》 (繁體中文)。2022-02-04。喺2022-02-14搵到。