默劇
表演藝術
默劇（英文：Mime）係一種以身體表演嘅藝術，演出者基本唔用文字同語言，只用自己身體嘅形體動作，表現出唔同嘅情緒、情節同故事。 喺好多現代默劇表演之中，演出者甚至唔用任何道具，只以動作畀觀眾感受幻想中嘅無形道具。 有啲默劇表演者為咗令觀眾注意力集中喺佢嘅身體而唔係面部表情，會戴上素白色嘅面具演出[1]。
歷史 編輯
默劇開始進入劇場演出係喺古希臘時期，當時期嘅默劇演員所演出嘅內容係用複雜嘅動作同手勢來描述每日生活嘅片斷。嗰陣時嘅默劇演出原則係建立喺動物行為學上，以教化人心，端正品格為主。 從希臘羅馬時代發源嘅默劇，其實一直存活喺正式劇場演出嘅邊緣，以諷刺或者滑稽嘅方式呈現喺觀眾眼前。
默劇娛樂大眾嘅最高峰係喺中世紀16世紀嘅意大利，為意大利即興喜劇，喺街市或者市集嘅地方演出。街頭演出者開始帶個誇張古怪嘅面具，以彌補技能不足。劇團會離開家鄉到外地去巡迴，傳播至歐洲各地。默劇藝術喺法國廣為流傳時期，好多傳統默劇手勢同默劇動作變得更加廣為人知。
模仿模式 編輯
- 狀況中嘅模仿
模仿一件事情發生，呢個係喺默劇中最常見嘅模仿方式，例如：拉繩、摸牆、爬梯等。
- 舞蹈中嘅模仿
喺舞蹈動作之中，模仿事情嘅發生。
- 單純嘅模仿
意思即係同戲劇或者舞蹈冇任何關連，只係單純噉利用身體描述事件本身，唔存在任何固定嘅形體作為模仿嘅對象。