龍舟歌

龍舟，又叫做唱龍舟，同木魚、南音、粵謳與及板眼一樣係粵調。嚮清朝經已開始有，一到端午節個陣時個啲龍舟公就會一隻手拎住支木做嘅龍舟仔（個龍舟仔多數係自己整），一隻手拎住支木棍仔，掛住個鑼仔同鼓仔，出到街出便，一自唱一自敲。噉就叫做唱龍舟。

而唱龍舟至出名嘅地方係順德，所以順德又叫做「龍舟之鄉」。^[1]

清唱本質

龍舟歌嘅出現同流浪藝人係節慶期間行乞討錢有關。佢哋往往揸住木雕嘅龍船逐家逐戶行乞，尤其係五月端午時節，藝人一手揸住上有龍船嘅木長棒，一手自敲小鑼小鼓伴奏，口唱吉祥歌文。龍舟歌接近木魚歌嘅說唱模式，後者係清唱，而龍舟歌只伴以小鑼小鼓，本質上仍然係清唱，所唱歌腔常常靠腔口帶動，自由度頗大。

直至廿世紀七十年代，《成報》響副刊「日日唱新聞」專欄，重用龍舟歌形式報新聞。下邊係佢哋響1978年10月29日，一篇講美國印第安紅人產品嚟香港促銷產品嘅報導：

「（龍舟）有個消息，講來幾新。都算市場之內，嘅好新聞。美國紅番，來港推銷產品。木材魚類，種類繽紛。從來未見，堪稱妙得很。屆時一定，會哄動好多人。點想現在定單，竟然鹿角是問。令到紅番代表，奇怪深深。鹿角有茸，定貨之人豈苯。唔係傎。想來行大運。定單定鹿角，無非想搵多銀。」

黎鍵（2007），《粵調．樂與曲》，懿津出版企劃公司