2021年英國女王因病去世謠言

2021年英國女王因病去世謠言，係指英國駐中國大使館6月4號喺微博嗰度上載咗一張蠟燭照片紀念天安門大屠殺32週年，中國網民同五毛網軍反而散播誤導性謠言，話係悼念英女王病逝，結果喺微博引發幾千條「英國女王因病去世」嘅假消息。雖然當時英女王伊利沙伯二世仍然健在（實際係到2022年9月8號先至去世），但有啲中國大陸網民得知自己事情真相之後，反而攻擊大使館攞女王嚟講笑。

事態發展

睇到張相之後，有啲大陸網民叫女王一路好走，中文維基百科亦好快有人修改咗話女王逝世日期係2021年6月4號。亦有啲網民推測，係咪因為打咗阿斯利康疫苗導致女王駕崩。 但係，呢張相喺微博上載咗唔夠20分鐘就被刪去，有啲網民笑大使館自己擺烏龍，但係英國駐華大使館公使兼副館長司徒娜（Christina Scott）喺Twitter澄清，話係畀微博嘅審查系統刪除。

事後評論

• 《環球時報》主編胡錫進喺微博回應事件，並冇批評散播謠言嘅人，反而話呢個女王「去世」嘅笑話係大使館挑釁中國嘅沉重代價。
• 獨立中文筆會成員、前記者劉逸明話，其實中共當時唔係唔知事件係謠言，但係官方覺得有用就唔會去審查。佢又話，有一啲民族主義者借機會攻擊英國駐華大使館。