2022年巴西大選

2022年巴西大選喺10月2號同10月30號進行，選出巴西總統同副總統、全部眾議院議席、三分之一參議院議席同全國所有州長。

總統選舉

現任總統波索拿諾競逐連任，任內嘅政見同發言都好偏鋒，佢喺2018年選嗰陣隸屬社會自由黨，但係到2019年退黨另組巴西聯盟（Aliança pelo Brasil），不過呢個黨因為收唔夠簽名數支持組黨，最後呢個黨解散，佢就喺2022年改為加入國會嘅右翼政黨自由黨出選。

而左翼嘅主要總統候選人就係前總統盧拉，佢之前喺2002年至2010年已經做過兩任，今次爭取佢第三個總統任期（巴西法例只係限定一個人唔可以連續做多過兩任），佢試過喺2017年因為涉嫌貪污被判坐9年半監^[1]，不過喺2019年已經放返出嚟，重被判冇罪。^[2]

選前民調顯示，盧拉支持率比較高，但唔過半，波索拿諾同盧拉相差大約10%。第一輪選舉入面，盧拉有48.43%得票，而波索拿諾就有43.20%得票，兩人要喺10月30號嘅第二輪選舉再分高下。

臨近第二輪選舉嘅日子，兩個人之間差距越嚟越窄，最後盧拉以唔夠2%嘅差距贏咗波索拿諾，第三度選贏總統。

眾議院選舉喺10月2號舉行。波索拿諾隸屬嘅自由黨喺513席當中攞到99席，成為議會最大黨，加上兩個盟友——進步黨同共和國黨分別攞到47席同40席，合共攞到186席。

而盧拉嘅政黨聯盟「巴西希望」就有81席，當中工人黨就佔咗69席。

參議院選舉喺10月2號舉行，會改選參議院嘅27席。波索拿諾嘅政黨聯盟「為巴西利益」喺27席當中攞到13席。而盧拉嘅「巴西希望」就得工人黨攞到4席。

起初波索拿諾唔肯認輸，但就應承會按照憲法進行權力交接，結果佢嘅支持者喺全國各地都有示威。