8355方法

8355方法（英文：8355 method，簡稱8355）係還原扭計骰嘅一種初級方法，由台灣人許技江（Reheart Sheu）發明，原理上都可以算係層先法嘅一種，特色係扭頭兩層嘅時候專登唔扭哂，留低兩格做「工作空間」，所以可以記少好多公式。同另一種常見嘅初級方法層先法要用大約6條公式相比，8355方法只需要1至3條公式。缺點同層先法一樣，需要好多步數，亦即係話會扭得好慢，唔係一個速解方法。

8355個名就係嚟自佢嘅步驟：

1. 第一層有9個方塊，但係只會扭好8塊，留返一個角位做工作空間；
2. 第二層有4個邊塊，但係只會扭好3塊，留返一個邊位做工作空間；
3. 利用第一、二層嘅工作空間，扭好剩返嘅5個邊塊，其中包括第2步無扭好嘅邊位；
4. 用公式扭好剩返嘅5個角塊，其中包括第1步無扭好嘅角位。

歷史

許技江喺佢寫嘅書《魔方高手製霸技》入邊提出呢種方法，賣點係唔使記好多公式就可以還原扭計骰。

睇埋

• 層先法
• 鎖匙窿方法

參考資料

書目

許技江 (2012)。《魔方高手製霸技》。河南科學技術出版社。ISBN 9787534952401。