Discman

Discman（ディスクマン）係日本索尼公司（SONY）喺1984年所推出嘅一個流動CD播放器產品，第一部機即係同年10月發表嘅D-50（北美型號叫做D-5），1997年10月到1998年3月響日本用CD Walkman^[1]。

概要

Sony CDP-101

1979年7月1號，索尼成功推出第一部卡式帶機TPS-L2之後開始響世界各地出名；跟住之後就好多人成日用呢樣嘢聽歌。1980年代開始，索尼同飛利浦一齊發表CD規格之後，即以見識到CD唱片喺未來嘅潛力，於是打算開發新產品取代1982年10月推出嘅CDP-101；由於佢主要係替代家用音響嘅關係，因此1984年推出嘅第一部Discman係四隻CD盒嘅大細。雖然Discman嘅聲音質素好過早前嘅卡式帶機，而且攞住部機出街聽歌換碟都幾方便；不過間中郁下佢都會跳綫，因此索尼開始全力研究防震技術改善問題。

1992年5月，索尼推出第一部3秒防跳操作嘅Discman D-515，然之後一路追加防震級數。不過為咗慳番成本，幾年之後便由日本轉去馬來西亞製造，入門產品同配件（應用軟件唔計）全部係中國大陸製造。

1999年7月1號，索尼推出20週年紀念機D-E01 / D-EJ01，佢用咗全新嘅G-PROTECTION防震技術，配搭兩粒香口膠叉電加上兩粒鹼性電芯便可以聽62個鐘，原裝大眼仔EL綫控連耳筒可支持CD-TEXT技術（顯示歌名、歌手名、曲目經過時間、總長度、唱碟名），亦係最後一部日本製造嘅產品^[2]^[3]。

2003年4月，為咗吸引MP3用戶嘅喜好，索尼公司開始發表ATRAC CD Walkman，用家可以用原裝軟件SonicStage將CD、MP3數碼音樂檔案通過燒錄技術記錄到一隻普通嘅CD-R / RW入面，佢最多可收錄490首歌（ATRAC3plus 48kbps，一首歌四分鐘計算）^[4]。