Potpourri

Potpourri係香氛乾花植物，個英文字 potpourri 源自法文。將啲乾咗嘅天然有香味嘅花或植物，撈埋一齊放喺個兜或者個缽度，用嚟薰香居屋，感覺上居屋空氣會清新啲。最早都係用陶瓷兜缽，而家啲人用木製兜缽多啲。以前香氛乾花植物，要撿啲有溫和香氣唔會攻鼻嘅植物先至得，而家有啲人會加各種精油增加香味。乾咗嘅花草材料至少可以放兩三個月，乾燥過程處理得好嘅話，可以放足廿年。根據英國皇家植物園2015年一份研究報告指出，用嚟整香氛乾花嘅植物材料，超過一百科去到四百幾種，最多人用玫瑰，包括花瓣、葉、玫瑰果、玫瑰油，其他香氛乾花植物包括香柏樹皮木碎、桂皮、丁香、茴香、茉莉、薰衣草、檸檬香草、薄荷、橙皮等。整香氛乾花植物要小心唔好撿有毒嘅植物，如果加精油都唔可以太過攻鼻，加太多精油都可能會中毒，尤其是驚細蚊仔或者寵物誤食發生危險。

赫伯特·詹姆斯·德雷珀畫咗一個女人做potpourri,1897年

法國有瓷器工場響 1750年代至 1760年代，製造咗十二個船型瓷器皿，用嚟放香氛乾花植物，法國國王路易十五嘅情婦龐巴度夫人就有三個揸手。船型瓷器皿而家全世界剩番十個。

另外有一種工藝 preserved flowers 中文有多種名稱包括永生花、不凋花、保鮮花，呢個工藝注重保存花本來面貌，甚至抽走花本身嘅香味，而香氛乾花植物 potpourri 就調反轉頭同佢相反，注重香氣。