Roger (狗)

Roger（2016年出世）係一隻白色拉布拉多尋回犬，喺台灣服役嘅搜救犬，又名羅傑，因為喺2024年花蓮地震嘅搜救工作得到台灣以及國際傳媒一啲關注。

佢本來係關務署嘅緝毒犬，喺緝毒犬訓練中心受訓，但由於佢太活潑好動，令佢容易分心，無辦法專心嗅聞毒品，結果被淘汰，後來輾轉成為搜救犬。

之後，佢通過IRO高級瓦礫搜索認證，隸屬高雄市政府消防局特搜中隊搜救犬隊，係「一線三星」隊員階級，過去也曾參與七次行動，其中包括2018年花蓮雲翠大樓搜救。

事件

2024年花蓮地震

喺2024年4月3號，花蓮發生規模7.2級大地震，佢喺砂卡礑步道尋獲罹難21歲胡姓女子，立下大功。不過喺Roger同領犬員李信宏一齊接受媒體訪問嘅時候，佢一口咬住中視同中天新聞嘅咪，就連領犬員都拉唔住，片段引起台灣，香港同一啲國際媒體關注。李信宏之後就話，佢以為個咪係玩具。亦有一啲香港同台灣不滿中天同中視親中立場嘅網民揶揄，Roger細細個就知道乜嘢有毒，乜嘢對台灣有害。

事後，高雄市長陳其邁親自送上雪糕形狀玩具同零食慰勞。

2024年5月擔當中職台鋼雄鷹開球嘉賓

喺5月1號，中職台鋼雄鷹邀請消防局特搜隊擔任開球嘉賓，更加讓Roger同埋另外幾隻狗狗粉墨登場，但就出現Roger咬波唔放嘅情況，令全場爆笑。