Talk:泛泰民族
關於定題
編輯我初時諗住定題做《壯泰民族》，對應中文版嘅《台語民族》，因爲「台」嘅粵音韻母歪咗，要避開「台」字，而Nothern Tai, Central Tai, Southwestern Tai都係台語民族（亦即成個泰語族、或者叫壯泰語族，Tai Languages），喺中國慣稱前兩者做壯，最後叫泰，所以夾埋做壯泰民族可以對應到所謂嘅台語民族。但篇文章係譯自日文嘅，日文嘅「タイ族」實質就係（泛）泰，噉範圍實質上收縮爲Southwestern Tai，我諗，呢度可能涉及到拆文章嘅問題，但唔理佢住，既然譯自日文，噉就同日文版掛鉤，就咪理中文版係咩回事喇。--S7w4j9 (傾偈) 2017年5月6號 (六) 15:41 (UTC)
關於thai來源於「大」
編輯我尋晚將日文維基呢條料放上畀朋友探討下，我哋諗應該係可信嘅。中文本身就有噉樣嘅用例，「太」就係派生自「大」，呢兩隻字字形好似，發音上亦聯繫緊密，啱好係濁變送氣清嘅變化。比如「太湖」，實質係「大湖」，個意思譯成英文就係the great lake。
對於台語，呢個字彙可以唔送氣，比如傣族自稱/taj51/，齊族自稱Tày，佢哋都唔送氣，緊緊係濁變清嘅變化。關於中文嘅「大」點樣喺台語演化出「自由、人」嘅意思，之後我會繼續譯日文嘅料。順帶一提，傣族嘅自稱嘅聲調係摺合到雲南話嘅，喺雲南話呢個調係上聲，所以喺普通話讀dǎi，廣州話亦可以仿照讀daai2。而審音配詞字庫定音做taai3，係因爲中國傣族原本就係叫泰族，1949年以後爲咗同泰國泰族區分（順帶講，Southwestern Tai嘅自稱從南到北，唔同方音有細微變化，泰、傣嘅區別就係一例），加咗人字邊生造咗個字，字音用摺合嘅雲南話發音，呢個就係佢嘅來頭。若果唔摺合雲南話嘅聲調，直接將傣話聲調放入普通話，傣字會係讀dài。--S7w4j9 (傾偈) 2017年5月11號 (四) 11:01 (UTC)
關於Lao（老/寮），一啲額外料
編輯老/寮作爲自稱，唔淨係老族人噉講，呢個詞其實泛見於成個壯泰語支嘅語言，喺泰文，佢嘅形式係เรา（RTGS轉寫：rao；音標：/raw/），意思係我哋、我、你，係用喺隨性場合嘅代詞。喺壯文，佢嘅形式係rauz，呢個係拉丁壯文，方塊壯文係「僚」，意思係「我哋」。歷史上壯人、布依人等叫過做僚人，個名就係取自呢個「我哋」，亦係一種自稱。
講樣你哋估唔到嘅嘢。粵語中有同源詞。就係「佬」，廣州話由於元音高化，aa音轉o音，做lou5，而喺廣州北郊嘅郊區話，佬讀laau5*1，噉樣你哋就可以睇得出佢同壯侗語嘅聯繫。喺粵語，呢個詞演化成代詞，中性偏貶，作爲代詞，同泰文一樣可以用喺隨性場合，比如「你哋班閪佬咁鬼衰嘅」，好隨性嘅講法。由於漢人同壯侗系越人接觸時，聽到佢哋佬佬聲（「我哋」作爲常用詞，絕對會經常聽入耳），咪將呢班人嗌做佬（十足十越南人嗌客家人做ngái噉，「𠊎」嘅空耳），久而久之，佬就變成一種稱呼借入粵語。
無論係老，定係寮，佢哋都係呢個侗台詞彙嘅形式，反映喺粵語，音路有啲唔同：老呢條綫走嘅係元音高化，即係/aw/變/ɔu/再閉口化成/ou/；寮呢條綫走嘅係介音滋生，據鄭張學說，上古漢音嘅r音喺後世會演化成介音-j-，比如家嘅上古音係kra，都晚期中古就變爲kia，同樣/raw/嘅/r/流音化成/l/時，亦都滋生咗介音，成/ljaw/，廣州話經歷咗韻腹轉移，變成/lju/嘅發音。
寮呢條綫，查咗《廣韻》，係四等韻leu，四等亦即意味佢係古一等、洪音四等，所以佢係畸變自一等韻嘅laux，以後廣州話唔再分三四等，就合成咗liu4音。
個人認爲，喺音路上，寮比老行多幾步，多咗介音滋生，然後韻腹移位，老尚且係一等高化，僚係一等變四等再同三等合流，所以相對來講，老更貼近侗台原音，所以我支持將Laos國譯做老撾，而非寮國。何況呢個同源詞喺粵語中就表現爲lou，用返lou音都係理所當然。
抄送畀Cedric同Cantona，記得你哋就Laos要用老撾定寮國嘈過一輪，呢度提供一個語言學嘅視角畀你哋參攷。我認爲，無論係漢語定係百越語，都係粵語嘅一部分，瞭解佢哋兩個，等同瞭解自己，呢度就做個百越語嘅解說啦。--S7w4j9 (傾偈) 2017年6月8號 (四) 14:58 (UTC)
六詔同南詔
編輯泰國同英國方面一直有聲音話六詔、南詔係泰族嘅，但中國方面唔認，我自己都覺得佢哋應該係白族而非泰族國家。anyway，作爲一種講法可以收錄，而且唔咁強調泰族色彩，就噉提下，應該係得嘅。--S7w4j9 (傾偈) 2017年7月10號 (一) 07:43 (UTC)