Talk:温庭筠

文學詞彙註釋：風格同詞格

呢度解釋下乜嘢叫做風格，乜嘢叫做詞格。作爲補充閱讀做參攷。呢度先引王先生《人間詞話》嘅金句：「飛卿詞，句秀也；端己詞，骨秀也；重光詞，神秀也。」

風格，係講你點寫、點講嘢、點遣詞造句。乜嘢叫做「秀」？俊秀囉。試比下面兩句，同樣寫江河水，劉詞「九曲黃河萬里沙」，李詞「一江春水向東流」，劉詞嘅風格叫豪，李詞嘅風格叫秀，一豪一秀，一猛一温，我相信點都睇得出遣詞造句嘅唔同，呢個就係風格。

而所謂詞格，係指立意表義，詞心境界。我讀文學有個心得，文學係人心對人生嘅觀照，但同時文學又係有佢形式嘅一面。尤其係詩，詩係兩者結合嘅極致，詩有詩體，極端形式化，比如詞就係有佢嘅字數、句數、押韻等等方面嘅限制，唔似散文形體好散，正因爲形式化，所以語言一定要精煉，唔提煉過嘅語言唔可以做得詩嘅語言，而古人話齋，「詩緣情」，情可以講係人心之爲人心嘅地方，因此詩離人心好近，亦就所謂「詞心、詩魂」。

同一種風格，句秀、骨秀、神秀分別係三種境界嘅秀，係三種境界嘅詞心所立出嘅詞風。試比三句，温詞「過盡千帆皆不是，斜暉脈脈水悠悠」，韋詞「不知魂已斷，空有夢相隨」，李詞「自是人生長恨、水長東」，都係寫怨，寫恨，寫思，都係詞心對人生別離嘅觀照，但温詞借望江女子，觀照到待人不至嘅虛無，韋詞借惜君一別後，觀照到魂夢不續嘅虛無，李詞借亡國之君，觀照到人生大悲不可抗嘅虛無，呢三者嘅詞心境界，我諗讀者心知。

風格係詞之風，係人心嘅性；詞格係詞之格，係人心嘅明。呢個係我對文中所寫「風格、詞格」二詞嘅註釋。--S7w4j9 (傾偈) 2017年2月17號 (五) 14:33 (UTC)

關於句、骨、神嘅比喻，我援引Bachelard《空間詩學》（La poétique de l'espace）：詩以佢嘅豐沛喺心度重新激發層層深度。（註，佢呢個文段嘅語境用咗迴響同共鳴呢兩個概念，呢個同我下面闡發嘅內容有關，留意下）呢句話講得形象啲，就係讀者之心似塵封嘅大鑼，詩用大鎚敲響咗大鑼，大鑼發出解封後嘅鳴響。所謂句，係指詩嘅形象性，詩嘅形象唔豐沛，蒼白無力係敲唔開人心嘅迴響；所謂骨，係指詩用佢嘅形容呢支鎚「敲」咗人心呢面鑼，所以詩有詩骨，有個骨力嘅問題，所謂藝術就係爆炸，你有無呢嚿骨去發力、喺我面前炸開佢呢？所謂神，係指人心靈魂對呢首詩嘅迴響，呢個迴響好微妙，照見到靈魂嘅深度（所謂深沉有力）、廣度（所謂稀聲廣傳）、豐富度（所謂重疊迴響），既係照見作者之心，亦係照見讀者之心。

呢個係我對句、骨、神三者關係嘅理解。--S7w4j9 (傾偈) 2017年2月17號 (五) 15:23 (UTC)