Talk:西角

西角嘅來由

呢篇文既參考「Lieut. Collision R. E, The Ordinance Map of Hong Kong, Hong Kong Government, 1845」上網搵極都搵唔到。如果有幅地圖睇過先信得過。--Minghong 2007年6月18號 (一) 18:13 (UTC)

• 如果你喺對個Reference有懷疑，你應該同時響Google尋求第二啲可能嘅的學術論著支持。呢度珠海書院蕭國健客席教授嘅論文，已經可以視為Second source to verify。Martinoei 2007年6月18號 (一) 18:29 (UTC)

• 搵倒呀，呢度：[1]。你自己試吓：http://www.grs.gov.hk/PRO/srch/english/sys_all.jsp?language=english （Government Records Service | 香港政府檔案處）。--WikiCantona 2007年6月18號 (一) 18:45 (UTC)

我有搵到過GAOGO (INTERNATIONAL) COMPANY LIMITED篇文，但同呢篇文無乜啦間喎。淨係提左一提西角個字，對於佢既資料一無所知。佢篇文其實係用「西角」黎指「西環」，可能係直譯West Point先得出呢個怪名。

而香港政府檔案處條link，又係得幾行字，都睇唔到幅地圖。無圖無真相喎。

其實呢家成篇野既內容都無參考資料支撐。--Minghong 2007年6月18號 (一) 18:58 (UTC)

• 你可以去 Public Records Office of Hong Kong 度睇睇，然後先話人冇參考資料「支撐」都未遲。唔係乜都可以喺網上睇晒，我都想喺部腦度打幾粒字就乜都睇倒啦，不過唔得。--WikiCantona 2007年6月18號 (一) 19:05 (UTC)

• minghong先生，WikiCantona引嘅你可以無圖無真相，你自己可以去PROHK睇。但你自己有無睇Gaogo篇文第二頁果度，有個注釋嚟自香港憲報，而篇文講係1857年果陣嘅行政區劃，基本上已經解答到你嘅問題。仲有鄭寶鴻寫嘅文[2]，都有講西角嘅位置，正係今日西營盤到石塘咀之間嘅位置，但係篇文係討論區轉貼，原文應該有書跟，我暫時唔可以當正係academic accpetable source嚟用。Martinoei 2007年6月18號 (一) 19:09 (UTC)

• 阿 minghong，益下你喇，搵到張圖 [3] 係個呢record，嘛嘛地清，唔信你都係要自己行一趟喇。--WikiCantona 2007年6月18號 (一) 19:29 (UTC)

• 我就係睇填海圖，都無個位似海角（上面幅地圖都show唔到邊度係「西角」）。所以先質疑呢篇文既可信性。我無質疑「West Point」呢個名，因為呢家都仲用黎。但「West Point」可唔可以直譯做「西角」呢？「West Point」又係咪一個海角呢？北角都叫角架噃，但北角從來都唔係海角。根據鄭寶鴻寫嗰篇文，「西角」其實係西環。我覺得「角」字仲可以解做「角落頭」，即係山旮旯（山卡啦）既地方。--Minghong 2007年6月19號 (二) 06:39 (UTC)

• GAOGO (INTERNATIONAL) COMPANY LIMITED 話『又西環之英文名稱為WEST POINT，本當譯作"西角"，蓋POINT為一小岬』，『小岬』嘅意思係乜呢？(1)兩山之間 (2)陸地向海突出的部分[4] = cape; promontory, headland, 中文嘅『海角』嘅意思係幾詩意嘅，不過意思係陸地向海突出的部分。--WikiCantona 2007年6月19號 (二) 07:02 (UTC)

回minghong君

首先我係同意minghong君，呢篇文有要改善嘅地方，只不係我要知想verify乜嘢先好搞。

證明方面，要網上搵倒先至係證明，會唔會少少本末倒置呢？維基百科係鼓勵人多引用印刷著作。【Lieut. Collinson R. E, The Ordinance Map of Hong Kong, Hong Kong Government, 1845】係香港政府最早期嘅地圖。研究香港英人接收港島初期嘅人，多數都知呢幅係乜。因為呢幅圖都算出名，好多書都講過哥連臣同香港做測量嘅事。其實幅圖好多地方都可以搵到，例香港政府檔案署，香港中央圖書館，以及唔少拍幅出書嘅地圖冊。一幅出咗之後，政府就會用佢來做藍本，所以亦都可以搵其他衍生地圖做佐證，可以搵附近開咗乜嘢路，有嘢變化。呢幅都相當有力嘅證明。

Ｗest Point響幅圖上面響，係響Possession Point同Belcher's Bay。響近岸嘅路(皇后大道)同去薄扶林條路(薄扶林路)個路口對出。你真係要睇下原圖先明白。你可唔可以畀你話邊幅填海圖，等大家對正下？

至於西角一名，我係見過嘅。可能你講話係證據不足，但係呢個譯名係好合理。以同時代香港命名法，East Point為東角(舊書譯做灣仔)，North Point為北角。West Point譯做西角都不為過，何況真係有新聞紙有書寫過(要再撞得返先可擺返上來)。雖然東角西角呢兩個地方因為有唐人住而一啲都唔流行(北角當時無乜唐人，好山"卡啦")，但唔等於唔可以有譯名。維基百科經常要翻譯外文地名，無理由香港就例外。再講，嗰陣時，本地人、水上人、客家人、鶴佬，地理上點叫西東北三海角真係無人知。

響英文文獻，West Point同Western District有好大分別。Point呢個字係海上突出嘅一點，唐人叫做角。響外地搬來維城嘅唐人，East Point同West Point係無乜意思。反而生計上面，四環九約就有意義好多。而唐人有自己一套叫法。而對於管香港嘅西人來講，West Point同East Point係成日用嘅地名。而Western District(以前都寫做Sai Wan)就係另一層次，係四環之中嘅西環，範圍就大好多。

時而勢易，好多地名原本指乜都無乜人留意。因為名可以擴大，收細，轉移，消失，合併。西角West Point都唔例外。West Point個名響發展過程，有擴大先，之後轉移，跟住再擴大。個名係跟住西環發展而變。

至於West Point寫都有人譯做西環，最少可見於紅van牌上。網上都好多人有呢個印象，例如網上有【西環人_We Live In West Point】[5]，教堂名[6]，西環係Sai Wan定West Point嘅疑問 [7](裏面係亂解)，九巴路線[8]等等。

HenryLi 2007年6月19號 (二) 06:57 (UTC)

都唔係話Ｄ咩精細既地圖，咪維基百科上面搵到既一幅圖（仲有其他既，不過咪大同小異）。就咁睇，咪淨係得大塘咀個一大個凹位，如果真係有個海角，我諗都唔慌大。如果淨係得英文既參考資料，好難話「West Point」譯為「西角」係岩架喎，點解唔可以譯做「西點」？我懷疑當時Ｄ華人唔會叫「West Point」（既中譯）呢個名囉，唔係無理由嚮Ｄ中文文獻度搵唔到「西角」呢個名，淨係搵到西環。因為華人用既係四環九約，西人就自己安Ｄ名出黎（即Ordinance Map of Hong Kong入面既英文地名）。

填海圖實在太粗糙，咁連Possession Point都睇唔到。West Point大概係西北大斜中間(成個海岸拉到直晒)。所謂point只係突出嘅一個角仔，地圖有個角位咁解。如果行過山就知，地圖上一點，實地來行就唔講得少。West Point呢啲名響英文來講實在太普通，只係西面一個海角。老實講美國出名軍校West Point，原本就響一個叫West Point嘅海角之上，但係唔知呢個背景嘅人，就咁譯做西點軍校，同你想法一樣。無論東角定西角，唐人都好少用，個名係西人用多。唐人用咗另外一啲特點來做地名，例如叫East Point一帶做灣仔。好多人都奇怪點解過咗鵝頸橋有灣仔消防局，事實上嗰度真係原本個灣仔度。地名呢啲嘢，真係唔係三言兩語可以講得晒。我越睇得多舊文獻，就發覺今日我個地理概念，同百幾年前嘅人差好遠。HenryLi 2007年6月19號 (二) 09:03 (UTC)

講開又講，張Ordinance Map of Hong Kong有冇show到北角？北角係咪海角（雖然我覺得唔係）？--Minghong 2007年6月19號 (二) 08:13 (UTC)

有North Point，係海角。係完全未填過個鑼灣，東岸北面最邊邊一角，係當時海港東界線起點。HenryLi 2007年6月19號 (二) 09:03 (UTC)

綜合一下我既疑問先，等大家好Ｄ傾。我既兩大疑問：

• West Point地理上係乜：West Point係海角？有乜証明先？
• West Point既正式中文名：West Point叫西角？點解唔叫西點？（當然如果佢真係海角既話，無理由叫西點）

--Minghong 2007年6月19號 (二) 08:23 (UTC)

• 都好，West Point 地理上係乜，你可以睇呢張圖[9]，清啲嘅 version 去 PROHK 度睇，乜証明先滿意你呢？
• 睇返啲而家叫 「Point」嘅地方都係叫「角」。不如你喺香港地圖上面搵個海邊地方叫 XX Point 而譯做 XX 點？
• 我唔係作者，查咗一論，我以為都應為滿足一般 Wikipedia 文嘅要求，你嘅疑問係唔係應改由你提相反嘅証明先呢？--WikiCantona 2007年6月19號 (二) 08:46 (UTC)

「西點」只係我舉既一個例子，我既問題係呢家無West Point中譯名既參考資料。亨利哥都講：「至於西角一名，我係見過嘅。可能你講話係證據不足，但係呢個譯名係好合理」，即係佢都一時三刻搵唔返佢嚮邊度睇過「西角」呢個譯名。我想呢篇文有返個証明者，好似西環呢個中文名就出現過嚮四環九約入面。--Minghong 2007年6月19號 (二) 09:01 (UTC)

• West Point 中譯名嘅參考資料 - 呢點同意，有時間都去搵下。講開有講，你喺中文圍基一定有好多 fun. 佢地啲譯名真係好出眾，好... 你有時間去問下佢哋。--WikiCantona 2007年6月19號 (二) 09:16 (UTC)

網上搵到個。香港藝術館：[10]，港島西角 <=> West Point, Hong Kong。其實好多外文地名，都無廣東話譯名，響維基百科都難免要譯，總唔可以下下靠外來source搵譯名verify。HenryLi 2007年6月19號 (二) 09:23 (UTC)

呢將相我都搵到過，不過又係只係提一提個地名。不過，我諗通左，其實香港島三尖八角，一個point者，都好合理。又唔係一個cape。我睇到「海角」呢兩個字，就聯想左去cape，其實細細既point都係海角者。呢個係中文地理名詞既問題。好似reservoir咁，叫香港既reservoir做水塘，咁又好似矮化左萬宜水庫同船灣淡水庫。但叫做水庫又好似誇大左Ｄ。不過呢家中文維基百科嗰邊係叫「香港水庫」。--Minghong 2007年6月19號 (二) 09:31 (UTC)

數學上來講，角本身都無話係要好尖先係角。就算廣東話都唔係一定要尖，如果我話呢個波起角，都只係突起咁解，唔係話有個條刺突出來。古代無人造衞星，飛機，佢地都係響地面海面去睇。字義唔係一成不變，有時會放大，有時會縮細，有時重會反轉。天星小輪家下都無輪，輪仍然留響小輪個名度。本來個【亂】字係解治理得咁解，但係之後變動亂咁解。【乖】本來係貶義字，例如行為乖張，家下竟然用來讚人。所以叫船灣淡水湖，萬宜水庫做水塘又有何不可？塘本來就係儲水嘅地方，調節水量，古文都有寫築土遏水若塘。叫水塘比水庫更加有意思。HenryLi 2007年6月19號 (二) 10:01 (UTC)

「角」同「角咀」

• 「角」同「角咀」有乜分別，響地型上都好似。
• 喺地圖角有時叫 point 有時用 kok
  • Ocean Point (棺材角），Brothers Point (大欖角)
  • Hau Tsz Kok (孝子角)--WikiCantona 2007年6月19號 (二) 07:24 (UTC)

角係廣東唐人叫嘅地形名(其他地方我唔敢講)，係指海邊突出來個地方。而咁啱英文個point又有咁嘅意思，就按廣東話習慣叫做角。

咀，正寫應該係嘴。只不過咁啱廣東話咀同嘴同音，又同口有關，先至簡寫成咀。國語兩個字係唔同義，所以無呢種誤寫。例如上海有陸家嘴。咀係咀嚼個咀，說文話係【含味】，英文suck; chew, masticate。而嘴就係口部，係雀仔個啄(轉為同昌字同韵)。所以本來就係撈唔埋。

嘴響地形來講，就係海邊伸出長長地一條，好似雀嘴咁嘅地。嘴好多時出現響，河口涌口。因為海水流會將條涌沙坭堆埋到突出來。 HenryLi 2007年6月19號 (二) 08:15 (UTC)

好簡單，Ｄ西人早期知道既地方咪叫Point囉，後期先知道咪用中文拼音Kok。--Minghong 2007年6月19號 (二) 08:16 (UTC)

• 你估定係你有啲乜嘢證明先？邊本書講先？--WikiCantona 2007年6月19號 (二) 08:29 (UTC)
  • 我估架咋。;-)你可以話我有口話人無口話自己。有錯既話話返我知。--Minghong 2007年6月19號 (二) 08:35 (UTC)
    • 送畀你嘅：Wikipedia:假定善意。你嘅解析都幾合理，如果呢個假設有啲證明就更好喇。--WikiCantona 2007年6月19號 (二) 08:53 (UTC)