Talk:長征

草地嘅細節編輯

最新留言：7 年前2則留言1個人參與討論

呢度寫低一啲細節，畀有興趣嘅讀者瞭解更多嘅歷史細節，而明白點解啲紅軍倖存者話最得人驚嘅環節係過草地，而唔係咩打仗、爬雪山、過大江、過有民族衝突嘅少數民族地區。

草地嘅危險之處有幾樣：

一，佢好大，睇資料話有1.5萬平方公里，海拔超過3500米，紅軍行咗七日七夜左右。而草地除咗少數地方係乾水之外，大部分係沼澤，亦即啲高原濕地，行過去係泥氹來嘅。有啲紅軍回憶話，有時連續三四十里都係過膝頭嘅泥水，行過涉水路嘅人都知，過膝頭哥嘅水行起路來特別攰，因爲阻力大。更何況有啲係大氹，一跣落去，就浸死嗰度。而松潘草地作爲無人區，除咗當地一啲藏人牧民外，外界一直唔知入面嘅地理情況，所以無地圖、無地理資料，所以點解國軍到草地一帶時就停咗追剿。
二，正因爲行路攰，所以體力消耗大。高原地方，會有高山反應，按啲紅軍講，凍唔緊要，佢啲窮人凍慣咗，最驚唞唔到氣，呢下先攞命。若果有嘢食補充體力，咁仲易話圍，弊在佢準備唔到。當時過草地紅軍超過10萬人，當地藏人不過20萬，而且一聽你共匪到，早就散曬，去到啲村都無人嘅，捉到藏人做嚮導，啲嚮導話佢哋聽，想過草地，起碼準備10日以上嘅糧食，備齊15日最好，當時10萬紅軍要備10日糧食約100萬斤，啲藏人遊牧，自家種嘅糧食都唔夠食，邊可能分到咁多畀紅軍？所以最後紅軍湊齊糧食不過每人五六斤到，食到第四日就絕，尾三日靠頂餓。而啲所謂嘅糧食係青稞粉、粒，草地嗰帶當時係雨季，啲青稞粉一掂水就一嚿嚿，食唔落，至於啲粒好硬，食幾多就屙番幾多，根本冇消化。而且有啲人因爲食唔慣，屙肚屙到病，而水度有蚊蟲，所以入草地時有啲人惹咗惡性痢疾，按啲軍醫回憶話，用金雞納霜都醫唔好。而嗰啲草地好荒涼，食得嘅嘢得野菜、水入面嘅魚，但佢哋唔識當地嘅植物，唔知邊啲食得，亦無工具去捉魚，而且草地咁危險，急於離開，無時間畀佢整捉魚工具。
三，以上講嘅係高原反應同飢渴。飲水中毒咩回事呢？因爲嗰啲泥氹水係死水，淤積喺度，積累好多毒素、寄生蟲，所以就算係畜生亦飲咗中毒。嗰啲水莫話飲，就算隻脚有傷，浸耐咗呢啲水，會迅速紅腫潰爛，有啲紅軍就係因爲噉而跛咗隻腳。
四，過草地時，當地係雨季，平均氣溫低過1攝氏度。松潘一帶我去過，確實啲天氣好寒涼，雨水多到濕冷，幾乎喺嗰度幾多日就落幾多日雨，紅軍亦回憶話七日過草地，日日雨未停。啲紅軍無帶咁多衫，由於喺金沙江、大渡河時急行軍，啲嘢抌得就抌，輕裝上陣，所以衫唔夠。嗰啲草地無樹，邊度有柴火呢？而且落雨濕濕，有柴都打唔着，而且啲天氣變化極端，落過雨仲會打雪珠、颳風雪。所以有好多人凍死、餓死，體力消耗本來就大，畀凍雨一淋，失溫就會好嚴重。
五，至於缺鹽之所以係種死因——重體力勞動嘅人，食飯一定會食重鹹，唔食咁鹹補唔返流失嘅咁多鹽分，唔食鹹會軟手軟腳。啲紅軍由於急行軍，連衫都唔要，自然亦唔會帶鹽，而草地嗰種地方邊度有鹽呢，所以軟手軟腳嘅情況下，一腳唔該就跣落氹度咪就噉死咗囉。

以上，就係點解話紅軍過草地時，要面臨極限危機嘅原因。呢啲屬於歷史細節，有興趣嘅人，希望對你哋理解呢啲事有幫助。--S7w4j9 (傾偈) 2016年12月12號 (一) 15:05 (UTC)回覆

補充啲嘢：佢哋過草地時糧食之所以唔夠，仲有個原因在於之前兩個月，由於毛澤東同張國燾嘅權鬥（路線之爭、領導權之爭），令部隊滯留太耐，所以消耗曬積蓄嘅糧食。分成兩路軍北上，係毛澤東提嘅，目的在於佢毛澤東要揸返住啲兵，作爲本錢，而當時張國燾冇睇穿毛澤東嘅計謀，所以同意咗。當時毛澤東嘅右路軍有紅一同部分紅四軍，而派朱德、劉伯承去左路軍係爲咗鉗制張國燾；但後來分裂時，右路軍嘅紅四軍人根本唔聽毛澤東支笛，全部跟曬張國燾南下（佢南下四川發展真係錯㗎，若果只係過路，川軍會放佢一馬，好似瀘定橋噉；若果係來搶地頭，會同紅軍死過，所以佢輸清光），可想而知當時毛澤東幾嬲幾傷心。所以點解明明紅四受苦最多，過三次草地兩次雪山，仲有西路軍啲嘢，但評價唔高——梗係啦，紅四都唔係毛澤東嘅親生仔，紅一先係。亦就點解，一直有講法話，安排紅四去西路軍，就係毛澤東想整紅四班衰仔，嗌馬家軍劏下你班人。不過呢個講法比較陰謀論，唔寫入正文，作爲花邊喺呢度知道下好喇。--S7w4j9 (傾偈) 2016年12月15號 (四) 16:18 (UTC)回覆

關於藏人編輯

最新留言：7 年前1則留言1個人參與討論

日文版提及到長征途中同藏人嘅摩擦。因爲呢個涉及到西藏問題，比較敏感，而身爲中國人意味住好難獲得對呢件事嘅真相，我搵咗啲資料睇，大概認爲日本人講嘅嘢係可信嘅，所以全部譯入。其實搵嘅資料，啲嘢講得都唔算直白，而日本人畢竟無噉嘅負擔，所以有嗰句講嗰句。

講到藏人對紅軍嘅反感，一來在於漢藏二族嘅嫌隙——因爲你係漢人，所以我本來唔鍾意你——二來拉薩政府對紅軍嘅資訊來自南京政府嘅通報，自然南京會醜化紅軍，噉一來攞到嘅印象就唔好，而紅軍自身有個問題：中共係宣揚無神論嘅，將宗教稱呼做「精神鴉片」，而藏人係佛教民族，聽到呢啲褻瀆宗教嘅話肯定覺得你好邪惡。不過紅軍到藏地其實都收起咗佢嗰套無神論，比如爲咗啲藏民能夠接納收留啲紅軍傷兵，佢做咗噉樣嘅宣傳：「收養紅軍是積德，傷害紅軍是造孽，殘害紅軍要下地獄」，而且呢套宣傳確實有效——諗下，宣稱世上無救世主嘅共產黨居然運用起佛教嘅說辭來做宣傳，實在係魔幻現實主義一種。記得劉伯承應承過藏人，遞日奪咗權，你哋藏人唔歡喜可以脫離中國獨立——當然啦，得個講，一旦試到權力嘅滋味，昔日乜嘢純真理想啊、延安清廉啊，都會喪失殆盡。唔怪佢嘅，當時嘅中共確實支持民族自決，嗰陣時嘅中共仲係好天真嘅左派。

至於喺藏地嘅見聞經歷對中共影響。我諗應該有。我以前讀過啲中共幹部做對藏工作嘅回憶錄，佢提到當時啲幹部有高竇心態，覺得你哋藏人落後、迷信，我哋呢啲漢人係來「解放」你哋嘅，然後因爲噉唔多尊重藏人，覺得佢哋嘅信仰、習俗、文化都係「落後糟粕」，我哋係來「解放」甚至「教化」藏人如此云云。我諗應該喺康區嘅見聞影響咗中共對西藏嘅睇法。而且進攻西藏時死咗唔少藏人，紐約時報之前報道過呢啲事，有興趣可以睇下。我唔負責任噉惡意猜測下，毛澤東啲脾氣出名臭，連周恩來咁忍得嘅人都覺得佢難相處，連莫斯科都夠膽對頂，噉有乜理由唔報復下藏人呢？十七條協議，攞來撕嘅嗟。（以上純屬一家之言，或有錯漏）。--S7w4j9 (傾偈) 2016年12月13號 (二) 11:56 (UTC)回覆