Talk:阿爾泰語言

學界新動態

阿爾泰語系嘅假說而家基本上解散，唔再認爲呢啲語言支系之間係同源關係，而更多認爲阿爾泰語係語言同盟關係（詳情可以讀英文維基百科）。原因在於，阿爾泰語系假說嘅提出，係基於類型相似，比如佢哋嘅粘着型語法、語序結構、元音和諧、流音/顫音唔打頭特點，但致命傷在於，佢哋冇同源詞根，能夠搵出嘅少數同源詞，基本上係蒙古征服時畀蒙古文滲透嘅借詞，另外一啲則可以用古代草原民族嘅文化交流來解釋。所以而家解散咗語系，突厥、蒙古、通古斯各自升格做咗語系，唔再係語族；但學界仲係認爲佢哋呢三個語系佢哋構成語言聯盟。可以引爲參攷嘅，係Ethnologue（民族語），佢係語種分類學嘅權威出版，佢嘅分類比較保守，譬如南亞語系（Austro-Asiatic）嘅新分類喺1990年代已經提出，但Ethnologue至今只承認南亞語系分做門達（Munda）、孟-高棉（Mon-Khmer）兩族，係個極其傳統嘅分類法，相比之下，Glottolog已經拆咗南亞語系做12語族，係比較學界前沿嘅做法。但最新版嘅Ethnologue已經解散阿爾泰語系，而有突厥（Turkic）、蒙古（Mongolic）、通古斯（Tungusic）三個頂級系（top-level family）。因此粵語維基應該跟上學界動向，畢竟連保守派權威都唔再承認呢個分法。提議《突厥語族》《蒙古語族》《通古斯語族》都改題成語系尾。--S7w4j9 (傾偈) 2019年7月9號 (二) 07:50 (UTC)