TransAmerica
呢篇文講棋。想搵保險公司嘅話，請睇全美人壽。TransAmerica 係種棋，係德式棋盤遊戲，兩到六人玩，玩法簡單但要一啲策略。隻棋冇隨機成分，不過就有資訊唔平等元素（每個玩家所持城市係重大秘密）。TransAmerica意思係橫越美國，起鐵路駁埋唔同城市嘅棋。
玩法
編輯布局
編輯棋盤係喺美國地圖，上便全部係等邊三角形網絡嘅點，當中35點代表城，分成五個區（東岸橙色；東南紅色；中北藍色；中部黃色；西岸綠色），每區有七城。如果玩家只有兩、三個，當中十個最難到嘅城唔用，變成每區五城，總共25個。
玩家首先抽城，每隻色抽一張城咭，總共五隻。抽咗唔畀其他玩家知道自己抽咗乜。
開局嗰時，計分版上每人有13 分，每完一局會倒扣。棋局有 84 條路軌共用，畀玩家輪流用。其中一個玩家，會抽做為頭一局玩先。
放路軌
編輯放路軌嘅目標，係令自己手上五城，最快駁埋全國路軌系統。所以要避免其他對手，快過自己達到目標。
每局開始時，每人輪流揀一點放路軌工廠（英文 Starting Marker，圖中嘅圓柱體，有黃紅藍綠白黑，代表六個玩家），個工廠可以放喺任何一點，包括城。重點係，以後放路軌，都要通到去間工廠。各玩家工廠係唔可以重覆。即係話，開局係以佢做起點。
每個玩家輪流放一到兩條軌，但如果要穿山或過河放軌（棋盤上暗粗線或紅色或者孖綫），每輪就只可以放一條軌。路軌系統係單一嘅（全國路軌），只要駁埋對手嘅路軌，咁雙方嘅軌就打通，可以用埋對方嘅軌。
勝負
編輯最快將路軌駁晒自己五個城，就贏一局，唔使扣分。其他玩家喺完局時，差幾多條駁埋自己五城，就扣幾多分。留意穿山過河計兩條路軌。例如爭 6 條軌，就淨低 13-6=7 分。
如果 84 條路軌用盡，無人駁埋自己五個城，就當係冚世界輸一局，每人計下差幾多軌先至駁晒自己五個城，齊齊扣分。
喺每局完咗捉分之後，如果有玩家分數零分或者以下，遊戲就完，最高分嘅就叫贏。若果所有玩家重有分，就從新開一局。上局開頭嘅，就退畀下一個，順序一樣，即係上局開第二，係變咗開局嘅人。每人會重新抽過五個城。
TransEuropa
編輯TransEuropa 被視為 TransAmerica 嘅姊妹遊戲，規則比 TransAmerica 複雜。