丁四醇

丁四醇（又叫赤蘚糖醇或赤蘚醇）係天然嘅糖醇（Sugar alcohol），食落幾甜（甜度有蔗糖 60%-70%）但低能量（卡路里），容易被小腸吸收而唔會肚痾，唔會引起蛀牙，未見有副作用，所以好多政府都畀佢代替糖或當成增甜劑加入食品內。

特質

1848年，蘇格蘭化學家 John Stenhouse 發現丁四醇。分子公式係 C₄ H₁₀ O₄。

丁四醇溶入水時會吸熱，食落好似有清涼嘅感覺。已經溶過喺水嘅丁四醇就無吸熱作用，口感同木糖醇（廣告俗稱「曬駱駝」）類似。

作為增甜劑，丁四醇會被混入其它增甜劑以增強甜味，例如混入甜菊糖甙而產生類似蔗糖嘅口感。喺呢個情況下，丁四醇嘅吸熱會產生令人抗拒嘅效果（唔似真正糖嘅口感），所以食物有時又加入溶水時放熱嘅菊糖抵消。

營養標纖

大部分國家都容許丁四醇以增甜劑加入食品內，但管制方法（尤其係營養標纖）都唔同。

• 美國規定丁四醇的能量以「每克 0.2 千卡路里」表示
• 歐盟規定丁四醇的能量以「每克 2.4 千卡路里」表示
• 日本視丁四醇的能量為「0 千卡路里」

小腸吸收

丁四醇雖然係糖醇，超過大半都可以被小腸吸收到血管內，並經尿道排出，唔係留底大腸內搞到肚痾。相比之下，其它糖醇（例如木糖醇）食好少都會肚痾，因為小腸係少少都唔要。之不過，因為丁四醇係低能量（卡路里），所以會被極量食用。如果短時間內食得太多，小腸吸收得唔夠快，丁四醇仍然會流入大腸導致肚痾。其它食物被極量食用都普遍有小腸吸收得唔夠快呢個現象。

細菌

細菌無法取用丁四醇嘅能量，所以丁四醇唔會引起蛀牙。丁四醇或有部分類似木糖醇傷害口腔細菌嘅作用。