七出之條
七出之條，又叫七出、七去、七棄，係唐人婚俗古禮，係七種丈夫可以休妻嘅理由。七個理由包括無仔、勾佬、唔孝敬家公家婆、講事非、私下拎夫家嘢畀人、妒忌、惡疾。呢種古禮，唐時轉成法律，而到民國時廢咗。
古時女子嫁入夫家，就以夫家為家，亦以當家公家婆就係父母。由外邊嫁入夫家嘅婦人，凡事要以夫家為中心，所以七出目的，凡係會影響家族嘅事，就有道理迫婦人做棄婦。之不過另一方面睇，七出亦規定咗只有呢啲情況先可以休妻，唔可以隨便棄妻，因為舊時一般棄婦下場十分棲涼，會影響社會。
七出之外，亦有三不去。即係有三種情況，不得休妻。一、已經無得返娘家。二、同老爺奶奶守過喪三年。三、貧賤之時娶妻，富貴後唔可以拋棄，亦即糟糠之妻不可棄。
兩者合稱七出三不去。
史
編輯漢時最先見七去之名。《大戴禮記》嘅《本命》篇：「婦有七去：不順父母，去；無子，去；淫，去；妒，去；有惡疾，去；多言，去；竊盜，去。」呢度父母係指家公家婆。
唐時七出正式成律，規定休妻要有特定條件。《儀禮疏》有寫：「無子，一也；淫佚，二也；不事舅姑，三也；口舌，四也；盜竊，五也；妒忌，六也；惡疾，七也」。次序有所改動。呢度舅姑係家公家婆咁。
大清時又改成「無子、不事舅姑、淫僻、嫉妒、惡疾、多言舌、盜竊」。