中環榕樹灣渡輪係香港一條港外渡輪線，來往中環四號碼頭同埋南丫島榕樹灣碼頭，而家由港九小輪旗下Islands Ferry營運。
渡輪線開辦時係由油麻地小輪營辦，1999年4月1號，油麻地小輪被政府收回部分專營權後，改由港九小輪接辦到而家。
由於南丫島必須依靠渡輪往來市區，客量都幾穩定，但每逢假日都會有大量遊客到南丫島旅遊，因此呢條線假日客量比平日多好多。
呢條線全部用高速船，船程大約27到30分鐘，但實際航行時間會受維多利亞港範圍航速限制、海上交通，天氣同海面情況等因素影響。
