中華人民共和國高速鐵路
呢篇文講中國大陸嘅高速鐵路網同埋計劃。想搵中國鐵路嘅高速列車及技術（包括高鐵同普鐵）嘅話，請睇中國鐵路高速列車。
中國大陸鐵路嘅高速服務開始於2007年，當時搞鐵路第六次提速，喺原有鐵路上引入咗高速列車；直到遞年嘅2008年中國大陸先開通專門嘅高鐵綫京津城際鐵路。而家中國起好咗好多條高鐵綫，除咗專門起嘅高鐵綫外，一啲原有嘅鐵路亦高速化，而喺未來有好多計劃緊嘅高鐵綫、提速計劃，當中唔少已經喐手開工。根據中國大陸嘅中長期鐵路網規劃，到2015年底中國大陸基本起好「四縱四橫」嘅高鐵骨架，而到2020年時速200公里以上嘅中國大陸鐵路里程超過三萬公里。而家中國大陸嘅高鐵非常之繁忙，2007年到2014年間累計客流31.6億人，佔鐵路客流嘅比重由2007年嘅4.8%上升到2014年嘅38.5%，到2015年1月日均客流249萬人[4]。
鐵路網方面，中國大陸高鐵經過33個省級政區中嘅28個[5]，覆蓋160幾個地級市（佔所有地級以上城市嘅55%以上）[4]。營運方面，由中國鐵路總公司營運。
對於中國大陸當局，起高鐵係擴大內需來刺激經濟增長嘅手段之一，所以起到霖霖聲，不過2011年原先嘅鐵道部長劉志軍因爆出貪腐而拉咗，同年發生温州高鐵事故，令公眾集中爆發對國有鐵路嘅不滿，高鐵呢範就有諸如安全隱患、票價高、利用率低、高鐵建設嘅財政負擔、起高鐵造成嘅環境破壞等等嘅不滿，呢啲輿論壓力令中國大陸高鐵進程放慢咗[6]。技術方面，早期中國大陸高鐵用嘅外國轉讓嘅技術，包括亞世通（法國）、西門子（德國）、龐巴迪（加拿大）、川崎重工（日本），後來中國工程師自行研發出中國高鐵技術，時速高達380公里[7]。
註
編輯攷
編輯- ↑ 〈中華人民共和國國務院令 第639號〉。中華人民共和國中央人民政府。2013年9月6號。喺2015年9月15號搵到。
- ↑ 〈China boasts world's largest highspeed railway network （大意：中國有世界最長嘅高鐵網）〉 (英文)。新華網。2015年1月30號。喺2015年9月15號搵到。
- ↑ 〈World's longest fast train line opens in China （譯：世界最長嘅高鐵綫喺中國開通）〉 (英文)。The Big Story。2012年12月27號。原著喺2012年12月29號歸檔。喺2015年9月15號搵到。
- ↑ 4.0 4.1 〈鐵路2014年投資8088億元 超額完成全年計劃〉。《證券日報》。人民網。2015年1月30號。喺2015年9月15號搵到。
- ↑ 〈High-speed rail a vital social good （大意：高鐵，旺盛嘅社會資源）〉。《廣州日報》 (英文)。環球時報。2014年12月15號。原著喺2016年3月3號歸檔。喺2015年9月15號搵到。
- ↑ "China acts on high-speed rail safety fears" (英文). Financial Times. 2011年4月14號. 喺2011年8月17號搵到.
- ↑ 〈時速380公里高速列車明年7月開行〉。《泉州晚報》。網易新聞。2010年11月2號。喺2015年9月15號搵到。