中華全國總工會舊址 (廣州)

  呢篇文講廣州市地區嘅中華全國總工會舊址。想搵武漢市嘅中華全國總工會舊址嘅話，請睇中華全國總工會舊址 (武漢)。

中華全國總工會舊址
中華人民共和國 全國重點文物保護單位
喺邊	廣東省廣州市
類	革命遺址同革命紀念建築
時代	1925年－1927年
冧	3-22
登錄	1988年
地圖

中華全國總工會舊址（粵拼：zung1 waa4 cyun4 gwok3 zung2 gung1 wui2 gau6 zi2）係中國廣東省廣州市嘅一間紀念館，喺越秀區越秀南路89號。呢間嘢係廣州市嘅愛國主義嘅教育基地。

史

國共合作時期

其實呢間嘢之前係清末時期起嘅惠州會館，喺嗰時係支援福建省同廣東省嘅軍隊司令部嘅地區。喺1924年1月到1925年9月，呢度係中國國民黨嘅中央黨部。甚至喺1924年7月到1924年10月，第一、二屆嘅農民運動講習所就喺呢度開辦。其中，廖仲愷先生就喺1925年8月20號俾人喺呢度暗殺咗。而1925年10月，中華全國總工會就搬咗入嚟呢度辦公，甚至重整咗秘書處、總務處、組織部、宣傳部、宣傳教育委員會、及監察委員會等機構。而呢間總工會重搞咗省港大罷工，重幫全中國嘅工人運動嚟搞培訓幹部、發展公允詛咒、搞統一嘅工人運動、統一廣東地區嘅革命根據地同埋支援國民政府嘅北伐戰爭都搞咗好大嘅貢獻出嚟。

總部搬咗去武漢

睇埋：中華全國總工會舊址 (武漢)

喺1926年5月，第三次全國勞動大會同第二次廣東省農民代表大會就決定咗喺會館入面起「廖仲愷先生紀念碑」同埋「工農運動死難烈士紀念碑」。而中華全國總工會喺1927年2月搬咗去湖北省武漢市之後，呢度就變咗中華全國總工會嘅廣州辦事處。

中華人民共和國成立咗之後無耐

喺中華人民共和國成立咗之後，廣州市政府就將中華全國總工會嘅廣州辦事處搞咗裝修，重喺1959年搞咗間紀念館。而館名係由嗰時劉少奇負責寫嘅。

文革時期

喺文革嗰陣，由於受到破四舊嘅思想影響，呢間嘢就俾當局閂咗門，甚至俾人破壞都有，而屋頂之前有嘅「惠州會館」呢四個大字唔好彩，俾人剷咗，甚至連劉少奇寫嘅「中華全國總工會舊址紀念館」嚿牌都拆埋。而舊址入面上下兩層樓嘅間隔板牆同地面嘅花階磚都冚唪唥拆嗮。嗰時呢間嘢又俾人搞成廣東省民政廳嘅複退軍人接管站，甚至重變咗廣東省華僑農場管理局、廣州市醫藥工業局、廣州市中藥二廠 （而家係廣州陳李濟藥廠）等單位嘅宿舍。

改革開放之後

到咗1982年，廣東省革命歷史博物館先至收返中華全國總工會舊址，交咗畀廣州市文化局嚟恢復返呢度啲嘢，之後喺1984年重新裝過修，甚至喺1985年5月1號恢復返開放。到咗1988年1月，呢度俾國務院話咗係全國重點文物。

踏入新世紀

而呢間嘢嘅風波到咗2008年，嗰時廣州市要搞深化文化體制改革，重將成個廣州市嘅博物馆搞市同區嘅分級管理。而呢間嘢同廣東革命歷史博物館一齊都唔例外，而館入面一位退咗休嘅老坑就反對呢項計劃，就向廣州市政府話暫時咪拆住呢間嘢。

建築嘅風格

呢間嘢有3層樓。其中1樓係廣州工人代表大會嘅會址，而2樓同3樓係大會嘅總禮堂同辦公室。而出面大門口入面同建築門口出面之間嘅左右兩邊，都有1926年5月嘅第三次全國勞動大會同埋第二次廣東省農民代表大會決定咗話整嘅廖仲愷先生紀念碑同埋工農死難烈士呢兩嚿紀念碑，雖然話廖仲愷先生紀念碑喺1966年俾人拆爛咗，但係喺1982年8月20號（廖仲愷先生死咗57周年嗰日），呢嚿紀念碑先至重新整返出嚟。而呢嚿紀念碑上面啲字之前係蔣介石寫嘅，不過喺重新整返出嚟嗰陣，上面啲字就變咗由葉劍英寫嘅，而啲字就變成「廖仲愷先生犧牲處紀念碑」。

圖集

工農運動死難烈士紀念碑 工農運動死難烈士紀念碑  廖仲愷先生犧牲處紀念碑 廖仲愷先生犧牲處紀念碑