九華山

九華山（粵拼：gau2 waa4 saan1），古稱九子山（gau2 zi2 saan1），係位於中國安徽池州青陽嘅山，係中國四大佛教名山之一，係四大菩薩中地藏菩薩嘅道場。

名

九華山原名九子山，「九子」係指山度有99座峰。改叫九華山，係源自唐朝詩人李白嘅兩首詩：《望九華贈青陽韋仲堪》、《改九子山爲九華山聯句並序》。

九華山嘅主峰係十王峰，有1344.4米高^[1]。九華山作爲佛教聖地，有好多佛寺，其中出名嘅有肉身寶殿、百歲宮、甘露寺、吉祥寺，當中嘅肉身寶殿珍藏住印度貝葉真經，係有一千年以上歷史嘅珍貴佛教文物。