呎

呎（英文：單數foot、眾數feet），卽係英尺，減筆寫成ft或′，係英國長度單位，流行於英國統治過嘅地方，家下畀公制取代。一碼有三呎，一呎有十二吋。換返公制，約萬分之三千零四十八米。

香港有時寫面積做呎，查實係平方呎嘅減筆。

名

英文呎卽係腳，同唐人度幾步，有異曲同工之意。舊時興用腳來咁度。歐洲各地都普遍用步來度。但人人腳長短唔同，各國長度唔一致。英國後尾以英王亨利一世爲準，不過佢隻腳以乎太大，極少人對腳有一呎長。

唐字用呎來表示，係借唐尺，口字畀表示外來，以別唐尺。方便起見，多數寫呎甚至尺。

寫法

唐字寫如兩呎四吋，英文two feet and four inches。減筆用單撇′代呎，雙撇″代吋，所以就寫成2′−4″、2′ 4″或者2′4″。國際上，亦會以ft.代呎。

標準

一九五九年以前，美國同英國，標準有啲唔同。一八九三年，美國定制係，一米有卅九又百份之卅七呎。而英國定制，係以碼爲標準，之但係，英聯邦之間都有啲唔同。英國國立物理實驗室（National Physical Laboratory），一九六四年制度定，一碼係千萬份之九百一十四萬三千九百六九米。所以推算一呎係千萬分之三百零四萬七千九百九十米。

一九五九年七月一號，美國同英聯邦，制定一碼做萬分之九千一百四十四米，此爲萬國英制。自此，一呎定爲萬分之三千零四十八米。咁比舊時美國定制，短百萬分之二，又比舊時英國定制，長千萬分之十七。