九鐵鬧鬼廣告

九鐵鬧鬼廣告係指喺1993年由奧美廣告製作，九廣鐵路推出嘅一段廣告。廣告被指太陰暗，搞到出現鬧鬼傳聞，廿幾年後都仍然被人討論。

廣告內容

呢段廣告喺中國大陸拍攝，入面有多位小朋友喺度扮火車玩遊戲，原意係九鐵服務會努力咁將大家對火車嘅美好印象由童年推展至永遠，但由於唔少人覺得廣告音樂同場景都好陰森下，加上播出街嘅版本色彩有一定問題，結果衍生咗唔少傳聞。

有關傳聞

廣告出街之後，有人話入面第三個小朋友面無血色，又有人說入面有小朋友嘴角流血，仲有人話入面有一位原來並唔存在嘅細路女，喺第二段出現咗。之後，甚至傳出連拍廣告嘅導演同埋所有小朋友都死晒。

各界跟進回應

九鐵

九鐵之後停播廣告，又搵返晒當時有份拍廣告嘅小朋友出嚟，證明所有人健在。九鐵又話，係剪接出咗問題，當時係拍咗幾次然後將比較好嘅部份放埋一齊，當時無察覺問題，所以之後先至有唔協調嘅情況，九鐵亦向各傳媒公開其他片段，證明佢哋無講大話。

無綫電視

無綫電視當年嘅節目《靈通天地線》，主持吳剛亦有跟進，證明小朋友相安無事。

文化影響

雖然傳聞澄清咗，但係至今香港同台灣兩地都會偶然有人再攞出嚟講，例如：

• 2017年ViuTV電視劇《詭探》，入面有神秘部門「第七行動組」追查一啲靈異案件，其中一單就係講呢個廣告。
• 2018年台灣全聯中元節廣告風波入面，有啲台灣媒體就將呢個廣告同九鐵鬧鬼廣告比較。