2018年台灣全聯中元節廣告風波

2018年台灣全聯中元節廣告風波，係指2018年台灣全聯福利中心喺中元節前夕推出，由奧美廣告製作嘅廣告，其中一支廣告，因為主角外型、場景內容都被指影射嗰時已故臺灣民主運動支持者陳文成而引起社會上嘅爭議。

有爭議嘅廣告內容

嗰段有爭議嘅廣告入面，著白襯衫嘅男主角，坐喺鏡面前，手上抱住一隻黑貓，但鏡面無反射出倒影，誠懇感謝中元普渡嘅人將佢哋當作真正嘅「好兄弟」，引起網上唔少討論。全聯喺自己嘅Facebook入面轉載呢段廣告嘅時候，甚至話佢哋今年中元7節請到「最難請」嘅代表。不過，有人發現，呢個男主角生前嘅背景同埋死亡時間都同多年前遇害嘅陳文成極為相似，Facebook同IG亦出現一個名叫Allen Chen嘅帳戶，頭像係廣告內面男主角，報稱係1950年1月出世，1968年至1972年就讀台灣大學，廣告入面嘅鏡亦寫上民國70年（1981年），正正就係陳文成遇害年份。

外間反應

有啲人覺得全聯咁做係消費已經死咗嘅陳文成，亦因為呢件事，多咗人關心228事件以外，白色恐怖之下無兇手嘅懸案。亦有網民估，另外兩段廣告嘅主角，係咪都係白色恐怖嘅受害者。

全聯嘅回應

佢哋後來上載成個廣告系列三段影片，影片內容包括早期曾受日本教育，講日文既媽媽、操外省口音嘅眷村伯伯，同埋被認定有影射陳文成嘅「講台語知識青年」，表示佢哋嘅初衷係為咗傳達喺台灣呢塊土地生長唔同族群嘅互相包容，鼓勵大家維繫「中元普渡」傳統習俗，事件純屬巧合，但考慮到社會反應，決定緊急停播廣告。