宿 (星官)
宿（粵拼：sau3）係天球上面，黃道同白道一帶嘅星官分區，總共有二十八，所以叫廿八宿或者二十八宿，古時亦有稱二十八舍。宿都各自歸入四象，每象七宿。宿之下由星官組成。
宿嘅意思，係月球會逗留嘅地方，所以都喺白道一帶[1]。月光每晚都會移位，宿於星空唔同位置。月在天行一周，要二十七晚多少少，即二十七日又百分之三十二，介於二十七同二十八日之間。故此分為二十八宿，當然亦曾分二十七宿。宿宿經廣不一定，有啲闊，有啲窄，並非等分。
二十八宿分於四象。東方青龍，角、亢、氐、房、心、尾、箕。北方玄武，斗、牛、女、虛、危、室、壁。西方白虎，奎、婁、胃、昴、畢、觜、參。南方朱雀，井、鬼、柳、星、張、翼、軫。
陳遵媯話宿出自遠古天球赤道，公元前二千四百年，春分在昴、夏至在星、秋分在房、冬至在虛，近當時天球赤道。二十八宿歸於四象，乃係華夏古時，星象定季節痕跡。
二十八宿，起名唔一次過得來。遠古天文，都係光星定時節，如此關係到農牧等生活，做好時節準備。堯典有「日中星鳥，以殷仲春」，「日永星火，以正仲夏」，「宵中星虛，以殷仲秋」，「日短星昴，以正仲冬」。鳥即後名星宿，火即後名房宿。殷墟甲骨文，亦散見鳥、火、井、角等名。光星，諸如牛郎、織女等傳說，參與商嘅故事，都陸續加入二十八宿。月令時已有二十七宿，淮南子有二十八宿，史記有二十七宿。而戰國墓穴，有曾侯乙墓漆箱，蓋頂畫有二十八宿兼有字，有青龍白虎。可見現存文物文獻，唔會遲過戰國成型，而漢後一律定制二十八宿。
地軸會循環攞動，此為歲差。擺動非常之慢，若非有精準天文儀器，或有幾百年長年對照星空記錄，根本難以察覺。之不過，就算點唔察覺，星空因地軸擺動而移位，星宿位置經緯道就有變化，赤道會變化，二十八宿位置亦會變化，長月累月就會發現同古星圖記載唔同，甚至二十八宿中間次序，亦有所顛倒。遠古時用光星為記，星空移位，變轉用暗星，用名相近。好似推斷織女為光星，移位後用女宿暗星代；牽牛為光星，移位後用牛宿暗星代；瓠瓜為光星，壺瓜中空為虛，移位後用虛宿暗星代；大角為光星，移位後用角宿暗星代。漢到明間，觜同參之經度，逐漸拉近，到時大明時已完全易位。
上古天文同星占不分。除咗有授時之用，亦視為觀測天下變異，為帝王祕術，二十八宿變化，都有含義。之不過，隨住技術進步，星占天下變得無咁重要，星占日漸失落，甚至失傳。反觀虛星之類，無實測天文之類占卜，諸如嘅紫微斗數，大唐起日漸得流行。
粵音爭議
編輯宿字讀「叔」定讀「秀」，向有爭議。叔為入聲字，秀為去聲字。二十世紀五十年代以前，星宿一字，字典粵音多數讀「叔」，而「秀」為異讀，有啲甚至無收「秀」音[2]。粵音韻彙起先指星宿讀「秀」，由於韻彙係第一本以音標標粵讀，影響甚大，此後各字典跟咗。
一解星宿係星星集合，唔係星星宿舍，所以讀「星秀」。之但係，另一解，二十八宿有如月光每晚寄居之處，即係宿。並唔係二十八組星星，宿解做住宿時要讀做「叔」，咁就無必要破讀為秀。外文獻都意譯宿為住宿之處，如 Twenty-Eight Lunar Mansions，可見不必破讀為秀。
史上有關問題，各有唔同睇法。
今日叔同秀音，上古可能係同一音，唔係都極為相似，都為入聲字。之後秀音失去入聲尾，變成破讀去聲。
戰國時期《禮記》[3]，西漢劉向《說苑·辨物篇》[4]，東漢許慎《說文》都話宿得入聲一個音。大唐白居易《宿溪翁》[5]大宋馬永卿《懶真子錄》[6]都話二十八宿嘅宿字係讀做「叔」。大清趙翼寫《陔餘叢考》，卷二十二指出：「二十八宿，宿字今人皆讀作秀。」。