亞洲電視文化資訊頻道

亞洲電視文化資訊頻道（簡稱aTV5，英語：Plus TV）係香港亞洲電視一條以標清格式播放嘅頻道，頻道冧巴係15，並以16:9闊屏幕畫面播。呢條頻道喺2007年12月31號開始播。呢個台多數播紀錄片同文化有關嘅節目，包括國家地理頻道、Discovery Channel（探索頻道）、英國廣播公司、日本放送協會（NHK）、港台電視部等有關嘅外購節目。呢條頻道要用升級版DMB-T/H接收器先至收到。

2008年夏季奧林匹克運動會舉行期間曾經改叫奧運15台，連埋本港台、奧運13台、奧運14台同埋高清奧運19台全天侯多角度直播奧運賽事。

由於亞洲電視重組佢嘅數碼地面電視頻道，文化資訊頻道自2009年4月1號起停播，一啲文化資訊頻道嘅節目轉至亞洲高清台繼續播放。而頻道冧巴15就畀咗中國中央電視台中文國際頻道（原頻道冧巴17）。