交換碼
交換碼係指交換電腦文件嗰陣所使用嘅編碼。
對於電腦嚟講，唔同系統有可能使用唔同嘅內碼。但係如果唔同系統之間要交換文件，就會發生亂碼現象。解決嘅方法就係，喺交換文件前，文件提供者首先將由內碼形式儲存嘅文件，轉換成交換碼形式嚟儲存，之後先至交換。對方接收文件之後，文件接收者再將文件由交換碼轉成內碼。
為咗方便起見，好多系統嘅內碼會直接使用交換碼，例如對英文系統嚟講，ASCII就廣為各種系統所使用。
中文交換碼 編輯
喺台灣，中文資訊交換碼（CCCII）係最早提出嘅交換碼，但係冇成爲官方標準。目前嘅官方標準爲中文標準交換碼（CNS 11643），但係並未得到民間支持。
對繁體中文嚟講，中文編碼嘅事實標準爲大五碼（Big5碼）或者統一碼（Unicode）。鮮有系統或者軟件用中文標準交換碼作爲內碼，甚至喺交換文件嗰陣時都唔會轉成呢種交換碼。而即使大五碼嘅設計只係作爲內碼，而唔係交換碼，當中好多字符都冇收入，交換文件時可能會造成部份資料流失，或者因爲各使用者嘅個人補充造字編碼唔一樣而令造字部份出現亂碼。不過因爲各大系統都用佢，於是大家寧願有呢啲問題，都仲沿用佢嚟交換文件。而家收字多過佢好多嘅統一碼普及咗，問題有所改善。