人魚

人魚jan4 jyu4（英文：merfolk / merpeople）係指想像中上半身係人（或者最少似人）下半身係魚嘅傳說生物。人魚喺世界多地（包括大中華地區同歐洲）嘅民間傳說都有出現，亦係現代奇幻作品成日用嘅橋段。

1900年一幅油畫，描繪畫家想像中嘅美人魚形象。

人魚嘅上半身可以望落同人類冇乜分別，又可以好醜樣好恐怖。美人魚（mermaid）係指女嘅人魚，尤其係上半身係靚女嘅人魚，而男嘅人魚喺英文會叫 merman。

描述

睇埋：海妖同人魚公主

人魚係種傳說中嘅生物，有人噉嘅頭同上半身同埋魚嘅尾。喺歐洲嘅民俗裏面，人魚有陣時又叫做海妖，好似仙子噉識用魔法同第啲超自然力量。佢哋出名鍾意唱歌，而且啲故仔好多時話佢哋嘅歌聲有魔力能夠迷惑人心。

佢哋通常好長命，但並冇靈魂，例如童話故事《人魚公主》嘅某啲版本就係噉。

好多歐洲嘅民間故事都講到美人魚同人類男人結緍。呢啲故仔通常係話個男人偷咗條美人魚（例如）把梳或者塊鏡。不過如果條美人魚搵返個人偷走咗嗰件物品，佢就會即刻返去海度。

人魚往往畀人描繪成會對人類造成危害。佢哋發起嬲上嚟可能會引發洪水等嘅災禍，而且出海嗰陣見到人魚據講係沉船嘅預兆。

起源

睇埋：儒艮同海牛

有種講法係人魚傳說嚟自好似儒艮同海牛等嘅海洋哺乳類。呢啲動物畀人指係遠睇可以好似人魚噉嘅形象。

睇埋

• 海豹女
• 海怪
• 盧亭

拎

• （英文） 美人魚，不列顛百科全書講美人魚相關傳說。