傳說生物

傳說生物（英文：legendary creature / mythological creature）係指一啲傳說中嘅生物，例如係龍同牛頭怪等。

西方傳說

2021 年斯洛文尼亞首都盧布爾雅那一座雕像；座雕像描繪咗隻典型嘅西洋龍。

• 西洋龍（western dragon）：歐洲人傳說裏面都有龍；同東方龍唔同，西洋龍傳統係凶惡（相對於吉祥嘅東方龍）、有翼曉飛（東方龍都曉飛，不過冇翼）、會噴火（東方龍通常唔會噴火），而且身形冇東方龍咁修長；喺現代奇幻入面，某啲作品將西洋龍描繪成好似天神一樣高於人類嘅存在。廿一世紀初有西洋龍嘅奇幻作品有夢工場嘅動畫片《馴龍記》（How to Train Your Dragon）。
• 仙子（fairy）：源自歐洲民間故仔嘅傳說生物；喺廿世紀嘅故仔當中，仙子通常俾人描繪成細粒、有好似蝴蝶噉嘅翼、仲曉用魔法；例子有 1953 年嘅迪士尼動畫片《小飛俠》（Peter Pan）當中嘅小叮噹（Tinker Bell）。
• 人魚（merfolk / merpeople）：喺世界多地嘅民間傳說當中都有嘅一種傳說生物，指上半身係人（或者似人）下半身係魚嘅生物，人魚上半身可以同人類冇乜分別，又可以好醜樣好恐怖，而美人魚（mermaid）就係指上半身係靚女嘅人魚；人魚可以係奸角－喺唔少故仔當中，美人魚都被描繪成會以甜美嘅聲唱歌，用佢哋嘅歌聲迷惑水手嘅心智同令船沉沒。人魚喺現代奇幻作品當中頗為常見，例如 1989 年嘅迪士尼動畫片《小魚仙》（The Little Mermaid）就係集中講美人魚。
• 不死生物（undead）：傳說生物嘅一個類別，指一啲明顯死咗、但（因為魔法等嘅超自然力量）能夠好似生勾勾嘅生物噉活動嘅生物－即係例如隻嘢曉郁同講嘢，但冇心跳同脈搏。
  • 鬼魂（ghost）：指因為肉體死亡而離開咗肉體嘅靈魂，通常觸摸唔到，能夠穿過實體。

睇埋

• 奇幻橋段
• 神話