代理匙

代理匙（surrogate key）喺數據庫上係主匙嘅一種，指條匙喺個數據庫以外完全係冇意義嘅。假想家陣設計個數據庫嘅人可能唔想個數據庫入面記住好似身份證號碼呢啲咁敏感嘅個人資料，所以佢就改改自己個做法－喺一個學生登記嗰時，佢都用擬亂數產生等嘅方法隨機噉產生一個有返咁上下長嘅號碼（例如 72108526761 噉），攞呢個數字嚟做嗰個學生嘅學生號碼；呢啲學生號碼喺個數據庫以外嘅地方係完全冇用嘅，而好似呢種用「喺個數據庫以外嘅地方唔會用到嘅特性」嚟做嘅匙就係所謂嘅代理匙^[1]。