以勒基金
以勒基金係香港一個基督教非牟利組織，喺1991年由陳歐陽桂芬創辦。各項事工嘅方向，都係以《聖經》為基礎，藉住各樣事工關懷一啲被忽略嘅群體，例如精神病康復者、弱智人士、長者等。
由來 編輯
1991年，陳歐陽桂芬接受咗耶穌做救主，因為深感到自己只係一名家庭主婦，又冇賺錢嘅能力，因此唔打算參與奉獻。後嚟，喺聖靈嘅感動同帶領之下，佢藉住奉獻令到一個瀕臨停止聚會嘅團契重新運作。又令到一位單身嘅老婆婆因為知道有人會負責佢嘅殮葬費而大大感謝天父。
呢啲意外嘅收獲，令到呢位只係一名家庭主婦嘅陳歐陽桂芬，重新去思想奉獻嘅辦法，佢心入面諗：我雖然唔能夠賺錢，但係我可以慳錢。於是，佢就將慳落嚟嘅錢開咗一個新嘅銀行戶口，專係作為奉獻之用。
有一日，歐陽桂芬心裏面有一個意念，想將呢個銀行戶口稱為「愛心基金」為將來有需要嘅弟兄姊妹作預備，但聖靈喺佢心裏話：「應該叫『以勒基金』，畀神負責就得喇。」「以勒基金」就係噉樣開始嘅。
