以賽亞書
《以賽亞書》，天主教叫《依撒意亞先知書》，係《舊約聖經》嘅大先知書，記載關於猶大國同耶路撒冷嘅背景資料，同埋當時猶大國嘅人民喺耶和華面前所犯嘅罪，重透露耶和華將要採取判決同拯救嘅行動。
簡介
編輯作者：以賽亞
日期：公元前680年
地點：耶路撒冷
以賽亞書係用公元前第八世紀末，住喺耶路撒冷一位偉大先知嘅名命名嘅。成卷書可以分為三部分：
- 第1至39章係當南國猶大被強國亞述國威脅時寫成嘅。以賽亞深知猶大嘅危機唔單止係亞述武力嘅威脅，更係由於國家犯咗違背上帝命令、唔信靠佢嘅後果。先知用種種嚴厲嘅警告同實際行動規勸人民同領袖要過公平正義嘅生活，重警告佢哋如果拒絕聽從上帝嘅命令，將招致敗亡毁滅。以賽亞又預言將來會有和平嘅日子，重會喺大衛嘅後代出現一位理想嘅君王。
- 第40至55章係喺好多猶大人被擄到巴比倫，喺沮喪絕望嗰時寫嘅。先知宣佈：上帝將釋放佢嘅子民，領佢哋返回耶路撒冷，開始新嘅生活。呢幾章嘅主題講明上帝係歷史嘅主宰，而上帝對佢子民嘅計劃包括佢哋對列國嘅使命，列國將因以色列蒙福。有關「耶和華嘅僕人」經文喺舊約聖經中最為人所熟悉。
- 第56至66章主要係向已經返咗耶路撒冷嘅人民講嘅嘢。嗰時人民急切需要保證，即係上帝將實現對佢哋國家嘅應許。先知表示對公理正義嘅關懷，亦重視遵守安息日、獻祭同祈禱。耶穌開始工作嗰陣曾經引用第61章1-2兩節，來表明佢嘅使命。
提要
編輯- 警告同應許（1章1節-12章6節）
- 對列國嘅懲罰（13章1節-23章18節）
- 上帝對世界嘅審判（24章1節-27章13節）
- 進一步嘅警告同應許（28章1節-35章10節）
- 猶大嘅希西家王同亞述人（36章1節-39章8節）
- 應許同盼望嘅信息（40章1節-55章13節）
- 警告同應許（56章1節-66章24節）