耶和華

耶和華，天主教譯雅威（希伯來文：יהוה‎；意思係 ｢自有永有者｣），係舊約《聖經》上面上帝個名嘅音譯。源於希伯來文嘅 יהוה（YHWH），י (yod) ה (heh) ו (waw) ה (heh) 。

因為古祭師忌諱神名，所以只留子音作記認，結果而家全世界都剩係知道神名子音而唔知母音，即係冇人知呢個名正確讀音係乜。

諱讀

喺天主教，呢個名通常忌諱唔用，用 ｢上主｣；呢個叫法喺基督教曾經亦都有用，但係而今已經少用。

尊稱

好多時，耶和華呢個名就算唔諱讀都唔會直接用，而係用尊稱上帝（天主教譯天主，基督教又譯神，景教譯阿羅訶；希伯來文：אלהים‎, Elohim），或者同時用名同尊稱。