耶和華

耶和華，天主教譯雅威（希伯來文：יהוה‎；意思係 ｢自有永有者｣），係舊約《聖經》上面上帝個名嘅音譯。源於希伯來文嘅 יהוה（YHWH），即係由右到左嘅 י (yod)、ה (heh)、ו (waw)、ה (heh) 四個字母。

希伯來文本來冇一個字母係母音，後來發明咗用 ｢點｣（ניקוד，niqqud）標母音嘅方法之後，因為古祭師忌諱神名，就標咗 ｢上主｣（אֲדֹנָי，Adonai）嘅母音落個名度，表示見到個名唔應該讀真名而係要讀 ｢上主｣，結果雖然而今嘅希伯來文聖經有標母音，但係仍然都剩係知道神名嘅子音而唔知母音，即係冇人知呢個名正確讀音係乜。｢耶和華｣ 同 ｢雅威｣ 分別係爾個名嘅兩種有可能嘅唔同讀法，而前者用嘅就係 ｢上主｣ 嘅母音。

諱讀

喺天主教，呢個名通常忌諱唔用，用 ｢上主｣；呢個叫法喺基督教曾經亦都有用，但係而今已經少用。

尊稱

好多時，耶和華呢個名就算唔諱讀都唔會直接用，而係用尊稱上帝（天主教譯天主，基督教又譯神，景教譯阿羅訶；希伯來文：אלהים‎，羅馬拼音：Elohim,），或者同時用名同尊稱。