伊鳳閣
伊鳳閣（粵拼：ji1 fung6 gok3；俄文：Алексей Иванович Иванов，拉丁轉寫：Aleksey Ivanovich Ivanov；1878年3月28號—1937年10月8號）係俄國嘅漢學家、西夏學者。佢出名在於研究咗《番漢合時掌中珠》，呢部書喺內蒙古發掘出土，係非常緊要嘅西夏文同漢文嘅翻譯辭典。
| 伊鳳閣 | |
|---|---|
| 原文名 | Алексей Иванович Иванов |
| 出世 | 1878年3月28號 俄國聖彼得堡 |
| 死 | 1937年10月8號（59歲） 蘇聯 |
| 職業 | 語言學者、漢學家、西夏學者 |
生平
編輯1897年，伊鳳閣入學聖彼得堡大學，喺嗰度佢修習中文同滿文。1902年畢業，之後佢去中國深造兩年，1904年回國，然後去爲期一年嘅遊學，去咗英國、法國、德國。1904年，佢喺聖彼得堡大學獲得中文講師嘅職位，1915年佢做咗中文、滿文教授。1922年，伊鳳閣去北京嘅蘇聯大使館擔任高級助理（通譯）[1]。1937年夏天，當時蘇聯發動咗大清洗，佢哋捉咗伊鳳閣，然後處決咗佢[2]。
1908年～1909年，彼得·哥茲洛夫喺內蒙古發現咗黑水城遺蹟，喺入面出土咗好多西夏文材料，當時冇人識解讀佢哋，伊鳳閣係第一位研究呢啲西夏文印刷本同手稿嘅學者。呢啲文物喺1909年秋天出土，啲書多達2萬4千件，有漢文、西夏文以及第啲語文，仲有好多考古物品一齊出土，之後哥茲洛夫將佢哋運去聖彼得堡嘅俄羅斯地理學會。呢啲文本後尾搬咗入科學院嘅亞洲博物館（而家嘅俄羅斯科學院東方手稿研究院）。伊鳳閣同滿蒙語文學者葛域池（V.L.Kotvich）一齊，去識別、保存呢啲黑水城嘅文獻。喺呢啲書中，伊鳳閣發現咗本漢夏雙語辭典，叫做《番漢合時掌中珠》，佢察覺出呢本書係破譯西夏語文嘅鎖匙。之後佢又發現咗三本西夏文嘅單語辭典：《音同》、《文海》、《雜字》。建基於《番漢合時掌中珠》同其他辭典，伊鳳閣編咗部三千隻西夏字嘅字典。部字典喺1918年完成，寄放喺亞洲博物館，寄放到1922年，然後伊鳳閣攞返份稿。因爲嗰陣時政治局勢唔穩妥，部辭典從未出版過。佢編辭典嘅事甚至連佢最得意嘅門生聶甫斯基都唔知，佢嘅呢位門生有部緊要著作，《西夏文字學》（1960年），部書奠定咗現代西夏學嘅根基。伊鳳閣嘅辭典留咗喺佢屋企，1937年佢畀當局拉咗處死後，部字典就不知所蹤，就此遺失[2]。
著作
編輯- 1909年. 《Из находок П. К. Козлова в г. Хара-хото》（粵譯：哥茲洛夫喺黑水城搵到嘅嘢） ; 出自《帝國地理學會通報》, 第45輯.
- 1911年. 《Страница из истории Си-ся》（粵譯：西夏史中嘅章節）; 出自《帝國科學院通報》第831～836頁.
- 1909年. 《Zur Kenntniss der Hsi-hsia-Sprache》（粵譯：西夏語知識）; 出自《帝國科學院通報》第六卷嘅第1221～1233頁.
- 1913年. 《Документы из города Хара-хото》（粵譯：黑水城嘅文獻）; 出自《帝國科學院通報》第463～477頁.
- 1918年. 《Памятники тангутского письма》（粵譯：西夏手稿）; 出自《俄國科學院通報》第六卷嘅第1221～1233頁.
- 1920年. 《Monuments de l'écriture tangout》（粵譯：西夏字碑文）; 出自《亞洲學報》第十一卷嘅第107～109頁.
攷
編輯- ↑ 馬悅然 (2010年)。《《Bernhard Karlgren: Portrait of a Scholar》（粵譯：高本漢 — 學人肖像）》。Rowman & Littlefield。ISBN 978-1-61146-000-1。
- ↑ 2.0 2.1 俄羅斯科學院東方文獻研究所。《《俄藏黑水城文獻》》。第1卷。上海古籍出版社。ISBN 7-5325-2036-6。