伍日照

伍日照（Daniel Ng Yat-chiu，1937年—2013年8月23號）係香港生意人，香港出世同長大。一九七五年將美國麥當勞帶入香港，人稱香港麥當勞之父。《經濟學人》發表巨無霸指數，亦同佢有關。香港慈善機構麥當勞叔叔之家，亦係佢搞起。

學業

佢伊利諾大學畢業，之後去倫敦帝國理工學院讀化學工程，得博士學位。

事業

佢讀完書後，去咗美國燃氣技術研究院打工。間院係歸伊利諾理工大學，主管環境保護同埋能源系統研究計畫。

一九七二年返香港。好友馮慶炤，即係唐人有錢佬馮秉芬個仔，邀請佢加入佢個基金公司做嘢，公司叫Inter-Asia Management Co. Ltd。當時美國麥當勞想開拓香港市場，聯絡間公司，物色本地合作伙伴。伍日照本來介紹個朋友，同馮氏父子合作。不過朋友甩底，伍日照頂上。伍日照同馮氏父子，準備齊齊開麥當勞。伍日照初時，家人都唔睇好。但佢堅持去美國麥當勞受訓，洗廁所、捧餐，乜都要做。一九七五年一月，全港首間麥當勞，開喺銅鑼灣百德新街，第一日生意好好，超過預期，生意額逾七千銀。當年漢堡包，賣一圓六毫。伍日照一直擔任香港麥當奴餐廳董事總經理。一九九五年，香港經營權，賣返美國總公司，佢就退任。

工作方法

佢落區格價來定價，睇下各區士多可樂、煙仔售價，得知市民日常生活開支，從而比對定價。伍日照管理麥當勞，有傷健共融，亦係全港餐飲集團之中，首家全面禁煙。

《經濟學人》年年發布巨無霸指數，反映唔同地區貨幣水平，概念同伍日照有關。1970年代後期，伍氏有位美國朋友，借伍日照，收集全球各地麥當勞巨無霸售價，然後喺律師會發布，引起《經濟學人》注意，發揚光大，年年該報發表新數據。

音樂

伍日照喜好西樂。

出面網頁

• 〈港麥當勞之父去世-有份促成巨無霸指數〉.
• 〈香港麥當勞之父逝世 創「巨無霸指數」成經濟指標〉. 2013-08-29. 喺2017-03-14搵到.
• 〈董事局伍日照先生〉.
• "Daniel Ng".
• 〈1975年百德新街開第一間店　港麥當勞之父　伍日照病逝〉.