開主選單

維基百科 β

20世紀三十年代嘅佐敦道碼頭
20世紀五十年代嘅佐敦道碼頭同巴士總站

佐敦道碼頭係香港一個已經拆咗嘅汽車渡輪碼頭,位於香港九龍油尖旺區,曾經係九龍規模最龐大嘅碼頭之一。喺未有海底隧道之前,係汽車過海嘅途徑。佐敦道碼頭嘅舊址已經填海,嗰個位置而家係港鐵西鐵綫柯士甸站同其他高尚住宅。

歷史

佐敦道碼頭喺1933年3月6號啟用,取代油麻地碼頭成為油麻地區嘅渡輪碼頭。呢個碼頭可以畀人雙層嘅渡輪用,當時有兩種渡輪,一種上層載私家車、下層載私家車同貨車,另一種下層載車、上層載人[1],當年開辦兩條航線嘅渡輪服務,一條航線係可以載人又可以載車來往佐敦道碼頭至中環統一碼頭嘅渡輪服務,另一條航線係來往佐敦道碼頭至灣仔只載人嘅渡輪服務。同一時間,當年成立嘅九龍巴士亦喺碼頭旁邊開設巴士總站,開設咗兩條巴士路線分別來往佐敦道碼頭去深水埗同去九龍城。之後,重開咗多條來往九龍同新界嘅巴士路線,令到呢個碼頭成為當時九龍最繁忙嘅碼頭,亦成為當時九龍區重要嘅交通樞紐之一。

1960年代,佐敦道碼頭附近嘅油麻地小輪倉庫改建成俗稱八文樓嘅文華新村,由於嗰度交通方便,而且樓價對當時嘅人都唔算太貴,所以吸引咗唔少中產階級入住,自此文華新村同佐敦道碼頭一帶都統稱做渡船角

但係1970年代海底隧道地鐵通車之後,佐敦道碼頭嘅作用開始減退,但係海底隧道唔准載有危險化學品嘅車用,例如運送石油氣嘅貨車,當時仍然有汽車渡輪嘅需要。1988年4月,佐敦道碼頭至灣仔嘅航線停辦。1994年1月6號佐敦道碼頭至中環統一碼頭嘅航線唔再載車,改為只載人。之後西九龍嘅開發,碼頭需要用嚟做填海工程用地,碼頭喺1996年2月1號停用,客輪航線改喺近官涌嘅臨時碼頭上落客。最後,渡輪業務喺1998年2月2號正式取消[2]

參考