佐藤榮作

佐藤榮作（1901年3月27號—1975年6月3號）係日本政治人，屬於自由民主黨，係第61-63任首相（任期1964年11月9號—1972年7月7號）。

佐藤榮作
出世	1901年3月27號 日本山口縣
死	1975年6月3號 日本東京
國籍	日本
職業	日本第61-63任首相

生平

1901年3月27號，佐藤榮作喺山口縣田布施町出世。1924年喺東京帝國大學（而家東京大學）法學部畢業，開始喺鐵道省做嘢。

屋企

• 阿爸因為係入贅女婿，所以改姓佐藤
• 親阿哥岸信介，因為畀阿爸本家收做養仔，而改為姓岸。岸信介都做過首相
• 老婆佐藤寬子（1926年結婚）
• 有兩個仔，其中細仔佐藤信二做過參議員
• 係前日本首相安倍晉三嘅外叔公

政途

佐藤榮作1948年加入自由黨（自民黨嘅前身之一）。喺吉田茂做首相嗰陣得到多次提拔，1948年畀吉田任命為內閣官房長官，1949年1月成為眾議院議員，其後連任咗11次。

後來首相池田勇人因為喉嚨懷疑生癌，決定辭職，揀咗佐藤榮作做繼任者。

喺佐藤榮作執政期間，試過多次參拜靖國神社；又為咗得到冲繩，多番討好美國，譬如支持越南戰爭。

後來因為外交政策失利，自民黨內部要求佐藤榮作辭職（繼任人田中角榮）。佐藤榮作掌政7年另8個月，一共在職2,798日。

其他

1974年，佐藤榮作因為令日本加入《核不擴散條約》而攞到諾貝爾和平獎。第二年喺東京都嘅藝妓館應酬時腦出血昏迷而死。