東京大學

**東京大學**
現任校長	藤井輝夫
學校類型	國立綜合大學
建立時間	1877年
所在地	日本東京都文京區本鄉七丁目
學生數量	28,697人（2007年）
教師數量	4,097人（2007年）
校園環境	市區
校園面積	249萬平方米

東京大學（日文：東京大学，讀音：とうきょうだいがく，簡稱「東大」）係日本第一間國立最高學府，喺日本東京都，1877年創立，係日本最老牌嘅大學之一，佢同日本另一間大學京都大學同樣享負盛名。依家東京大學本部校址係日本東京都文京區本鄉七丁目嘅3番1號。

東京大學前身係1864年明治年間創立嘅東京開成學校同埋東京醫科學校，1877年改制成為日本首先以現代學制為之綱要而成立嘅大學。

東京大學喺學術方面出產咗6位諾貝爾獎得獎者，喺政治方面出產咗6位日本內閣總理大臣（首相）。

歷史

東京大學紅門

明治維新之後，日本政府統合咗江戶幕府所直轄嘅昌平坂學問所、開成所同醫學所，為之「大學校」，成為東京大學前身嘅東京開成學校同醫學校。

東京開成学校係東京開成所，文久三年（1863年）創立，本來係教授「蘭學」嘅幕府直轄院校，明治4年（1871年）聯同昌平坂學問所、醫學所改組成為「東京開成學校」。明治10年（1877年）4月12號同「東京醫學校」（東京醫学校）再合組為東京大學，歸當時文部省所打理。大學最初淨只係得四個學部：法學部、理學部、醫學部同文學部，學生人數係1600人左近。以學士授與機關而言，東京大學係僅次於明治9年（1876年）設置嘅札幌農學校（今日嘅北海道大學前身）。

明治19年（1886年）3月，日本政府頒佈「帝國大學令」，將東京大學易名做帝國大學，係法理醫文四學部之外，另立工學部。明治23年（1890年），政府再頒令，合併東京農林學校，設置「農家大學」。明治30年（1897年）6月改名做東京帝國大學，以呼應京都帝國大學（今日嘅京都大學）嘅創立，免生混淆。大正8年（1919年）再設立經濟學部。

二戰之後，喺昭和22年（1947年）9月復名做東京大學。之後幾年之間，直至昭和33年（1958年），陸續設立教養學部、教育學部同埋藥學部。

校區

東京大學有本鄉總校區（東京都文京區）、淺野校區（東京都文京區）、彌生校區（東京都文京區）、駒場校區（東京都目黑區）、白金校區（東京都港區）、三鷹校區（東京都三鷹市）同埋檢見川校區（千葉縣千葉市）七個校區，加咗個附屬植物園、農場、牧場、海洋實驗場、理學實驗場、工學實驗場同埋附屬學校，面積好大嘅，約莫1518萬平方米。

學部

東京大學嘅哥特式風格建築－法學部二號館

東京大學有法學部、醫學部、工學部、文學部、理學部、農學部、經濟學部、教養學部、教育學部、藥學部。而家提供約260種專業領域，超過2,000種學位課程。東京大學同世界嘅學術聯繫相當緊密，並同世界嘅頂尖高校好似牛津大學、劍橋大學、哈佛大學、麻省理工學院、加州理工學院、普林斯頓大學、斯坦福大學、耶魯大學、哥倫比亞大學、愛丁堡大學、柏林大學、澳大利亞國立大學同北京大學有校際合作關係。

排名

東京大學嚮學術方面係世界排名最高嘅大學之一。東京大學於2011年《QS世界大學排名》中排全球第二十五位^[1]，於2012年《世界大學學術排名》（ARWU）中排全球第二十位^[2]，於2012-2013年《泰晤士高等教育世界大學排名》（Times rankings）中排全球第二十七位同埋亞洲第一位^[3]。