來路不明嘅火車

《來路不明嘅火車》（法文：Le Train de Nulle Part；英文：The Train from Nowhere），係一部響2004年出版，由法文寫成嘅小說。呢本書共有223頁，最大嘅特點係全本書無動詞，作者米歇爾．塔萊（Michel Thaler）聲稱係全球第一部無動詞嘅小說。

背景

《來路不明嘅火車》喺2004年4月22號率先響法國出版。作者米歇爾・塔萊係佢嘅筆名，佢自稱係文學博士，年約60歲，之前未出版過任何嘅書。對於出版呢本書嘅動機，佢解釋話「動詞就好似花叢入面嘅野草，你要鏟咗尐草，等尐花茁壯成長」，而且呢本小說當中係太多關於動作嘅描述，而係着重對火車乘客嘅形容。

評論

雖然作者自評《來路不明嘅火車》係「文學史上嘅一次革命，大膽、現代、對文學嘅意義，有如偉大嘅達達主義同超現實主義」，但係大部份嘅評論都係批評呢本書。雜誌《新觀察家》認為呢本書令人不快，重話作者對女乘客嘅描寫，說明作者有厭女症。權威文學雜誌《Lire》批評呢本書「好似係11歲學生寫成嘅作品」；美國《高等教育紀事報》話呢本小說「令人不安、引唔起食慾」；愛丁堡大學文學系教授 Geoffrey Pullum連續用咗三個「瘋狂」嚟形容呢本書。

對於一面倒嘅批評，米歇爾・塔萊不以為然，重話呢尐反對者過於保守。