俄羅斯方塊

俄羅斯方塊（粵拼：ngo4 lo4 si1 fong1 fai3；英文：Tetris、俄文：Тетрис）係1980年尾至1990年代初風靡全世界嘅電子遊戲，一般畀人歸類做解謎類，係落下型益智遊戲嘅始祖。

俄羅斯方塊

有研究者發現玩俄羅斯方塊遊戲有助於防止創傷後壓力症候群嘅發生，可能係呢個遊戲能夠對大腦儲存視覺記憶嘅功能產生干擾，從而保護病人免受創傷後應激反應嘅影響。

亦有學者發現玩俄羅斯方塊並且佩戴一種特殊嘅眼鏡可以治療細路弱視。

簡介

俄羅斯方塊原本係前蘇聯科學家阿列克謝·帕基特諾夫（Алексей Леонидович Пажитнов）喺1984年6月利用空閑時間所編寫嘅遊戲程序，據講遊戲嘅作者最鍾意網球（Tennis）運動，於是，佢將源自希臘話嘅tetra（意為「四」）同佢結合，造咗「Tetris」一詞，之後開始提供授權畀各個遊戲公司，造成各平台上軟件大量發行嘅現象。

Game Boy版嘅俄羅斯方塊喺日本賣出424萬套，係Game Boy史上最賣得嘅遊戲。波斯灣戰爭時，亦係前線美軍最常用來消磨時間嘅遊戲之一。

由於俄羅斯方塊具有數學性、動態性同知名度，亦經常被用來作為遊戲程式設計嘅練習題材。按照健力氏世界紀錄大全，俄羅斯方塊家陣共有9個世界紀錄，例如手提電話下載次數最多嘅遊戲等。

特點

俄羅斯方塊嘅最大特點係佢無法用任何實體嘅形式進行，淨係可以用喺平面形式進行。

規則

• 俄羅斯方塊係由下面呢幾種四格骨牌構成，每種方塊都係由四個黐埋嘅格仔砌成，總共有七種：
  • I：最多消除4層
  • J：最多消除3層
  • L：最多消除3層
  • O：最多消除2層
  • S：最多消除2層
  • Z：最多消除2層
  • T：最多消除2層（T轉規則最多可以消除3層）
  • 有啲遊戲有單格方塊，可以穿透固定嘅方塊到達最下層空位。其他嘅改版度出現更多特別嘅造型。

• 方塊會隨機抽出，喺遊戲區域上方中間位置出現，然後緩慢繼續跌落去。
  • 現代通常用「7-bag」規則，即係「七種方塊各一個」叫做一袋，每次喺一袋入面隨機抽出方塊，直到成袋空咗，再開新一袋。咁做嘅好處係：一個方塊出現後，最多隔12個就必定會再出同一種方塊。
• 玩家可以做嘅操作有：以90度為單位旋轉方塊，以格為單位左右移動方塊，以及畀方塊加速落下。
  • 現代規則通常有「順時針方向轉90度」、「逆時針方向轉90度」同埋「旋轉180度」呢三種轉法，適當咁運用，可以轉入一啲特定嘅罅位。
  • 現代規則通常有「軟降」同「硬降」兩種加速落下操作。「軟降」只係加速落，而「硬降」係直接落到最底。
  • 現代規則通常都有「切換」功能，即係有一個儲存格，可以暫時保存而家落緊嘅方塊。如果儲存格已有方塊，就將落緊嘅方塊同儲存格入面嘅方塊交換。每次新方塊出現後，只可以切換一次。
• 方塊跌到落區域最底或者跌到落其他方塊上唔能夠再向下移動嗰時，就會固定喺嗰度，之後新嘅方塊出現喺區域上方開始跌落。
  • 現代規則通常喺方塊落到最底時，唔係即刻固定，而係有一段短暫時間畀玩家操作，例如有時需要方塊落到最底，再向左移一格，攝落個窿度。
• 當區域中有一橫行嘅格仔全部由方塊填滿時，嗰行列就會被消除並成為玩家嘅得分（如果係對戰模式，消除時會畀啲垃圾行對方）。同時消除嘅行數越多，得分就會越高。
• 當固定嘅方塊堆到區域最頂而唔能夠消除層數時，遊戲就玩完。
  • 現代規則通常係，當新嘅方塊冇位出嘅時候結束遊戲。

一般嚟講，遊戲重會提示下一個（甚至下幾個）將會跌落嘅方塊，熟練嘅玩家會計算到下一個方塊，評估而家要點樣進行。由於遊戲能夠不斷進行落去對商業用遊戲唔太理想，所以一般重會隨住遊戲嘅進行而加速提高難度。

變種遊戲

俄羅斯方塊由於好受歡迎，有啲遊戲廠商用佢做藍本，開發出唔同嘅變種遊戲：

• 決戰俄羅斯（Face to Face）：台灣交通大學大一學生蔡祈岩同王功華製作並喺1990年由台灣嘅智冠科技（當時叫軟體世界）出版，加入兩人對戰同好多道具，並首創同電腦對戰功能，以操作流暢同合理設計將呢款遊戲推向全新高度，迅速風靡中港台同亞洲各國，係華人自製電腦遊戲嘅先河。
• 立體方塊：將原本2D嘅方塊改為3D，以增加遊戲嘅挑戰性。
• 臉譜方塊：將人嘅臉譜分割成五等份（額頭、眼、鼻、嘴、下巴），將隨機跌落嘅臉譜各部份拼成正確嘅臉譜就可以消除並得分。

知識產權問題

俄羅斯方塊嘅智慧財產權由前蘇聯嘅外國貿易協會（ELORG）持有，而家由The Tetris Company繼承。雖然大型機器上販售嘅俄羅斯方塊遊戲多數有授權，但因為佢規則簡單、容易開發，事實上有好多未經授權嘅產品亦到處散佈。1990年代初期，全世界大量流行嘅小型遊戲機，大半係類似俄羅斯方塊嘅遊戲，都係未經授權產品。

甚至，好多特登唔用Tetris個名嘅類似俄羅斯方塊嘅遊戲機器喺著作權官司度事實上都得到勝訴。呢個意味住俄羅斯方塊呢種單純數學性質嘅遊戲，權利人喺著作權訴訟度亦好有可能居於劣勢，咁樣對遊戲開發廠商來講係好大嘅衝擊。因此，好多遊戲開發廠商都有唔太願意開發呢類數學性質遊戲嘅傾向。

睇埋

• 俄羅斯方塊99