倍達國

倍達國（諺文：배달국），又叫做神市（신시），係朝鮮半島傳說中嘅古國，由天帝桓因嘅仔桓雄創立。

根據《三國遺事》同《帝王韻紀》嘅記載，天帝桓因嘅仔桓雄想落凡間同人類一齊生活。得到桓因嘅同意之後，桓雄就帶咗3,000人降臨到太白山，建立咗「倍達國」。除咗帶來風伯、雨師、雲師之外，桓雄重制定咗相關嘅法律、法則，並教畀人類各種各樣嘅藝術、醫學同農業技術。

據講，當時山洞裡面有一隻虎同一隻熊，佢哋求桓雄將自己變做人。於是桓雄畀咗佢哋20片蒜同一把艾草，並同佢哋講，食咗之後一百日內唔可以見陽光。隻虎做唔到，所以變唔成人；而隻熊就喺第21日嘅時候變咗做女人。因為冇老公，「熊女」就喺一棵神檀樹下再次向桓雄祈禱，希望可以有個仔。桓雄被熊女嘅祈禱打動而娶咗佢。後尾熊女生咗個仔，就係檀君王儉。